Nokre seglasar nærmar seg fullbooka

Havila Kystruten og Samferdsledepartementet er framleis i forhandlingar om ein avtale for korleis skipa til reiarlaga skal segle på den tradisjonsrike kystruta mellom Bergen og Kirkenes. Nøyaktig korleis oppstarten og seglingsplanen blir, er difor for tidleg å seie.

Men administrerande direktør Arild Myrvoll fortel at dei allereie opplever god interesse for seglasane som er sett opp frå 6. juli.

– Vi har veldig godt belegg på båtane for sommaren og utover hausten, og ein del seglasar er tilnærma fullbooka, fortel Myrvoll til NETT NO.

Det vil seie at skipa er så fulle som reiarlaget ønsker at dei skal vere på noverande tidspunkt. Kystrute-direktøren påpeiker at dei også har meir lempelege reglar for å avbestille reiser, med den smittesituasjonen marknaden er i.

Myrvoll fortel at det også er mange frå utlandet som har bestilt turar, og desse er naturleg nok avhengig av korleis reisemoglegheitene blir utover sommaren.

Behov for langt færre skip
Utviklinga av koronapandemien gir utfordringar på ulike vis for reiarlaget. Ein ting er at kystrutestrekninga blir operert med langt færre båtar, som følgje av lågare etterspurnad.

No er reiarlaget i forhandlingar med departementet om ein tilleggsavtale for andre kvartal. Myrvoll fortel at både tidslengda for nye avtalar og innhaldet i dei, er mellom diskusjonstema mellom partane.

– Dette er noko vi forhandlar om. Vi ønsker føreseielege avtalar og det er ikkje heilt lett å skulle innrette seg kvartal for kvartal - verken for oss som selskap, eller dei som skal arbeide om bord i skipa, legg han til.

Rett før påske blei det kjent at Hurtigruten skal segle med fem av sine sju skip ut juni.

I utgangspunktet skulle dei to reiarlaga segle med til saman 11 skip på strekninga. Men det var pandemien slo til. Samferdsledepartementet sin kommunikasjonseining opplyser til NETT NO at dei førebels ikkje kan seie noko om kor lang tid det vil ta før behovet er oppe på same nivå som før pandemien.

(saka held fram under)

Korona-utfordringar i Tyrkia
Arild Myrvoll og eigar Per Sævik var mellom fleire frå reiarlaget, som før påske besøkte Tersan-verftet, der to av skipa nærmar seg ferdige.

Sævik legg ikkje skjul på at pandemien har gitt både dei og verftet ekstra utfordringar.

– Det har påført oss forseinkingar, så det er ikkje tvil om at det har skapt betydelege problem. Det har vore vanskeleg å få inn både servicefolk og anna. Eg har inntrykk av at verftet gjer så godt dei kan, men ein del av konsekvensane er ikkje lette å handtere, fortel Sævik til NETT NO.

Den siste leveringdatoen som er antyda, er månadsskifte mai/juni. Men med ein ustabil smittesituasjon, vil det ikkje kome som noko stor overrasking om skipa blir nokre nye veker forseinka.

– Det går framover, men vi fekk nyleg ei oversikt som viser stigande kurve på koronasmitta der nede. Det lovar ikkje så bra, men vi får sjå, seier Sævik.

(saka held fram under)

Prøvetur i april
Etter planen skal begge skipa ut på prøvetur i løpet av april. Den planlagde blåfargen blir ikkje malt på før kort tid før levering.

I første omgang vil det vere jobb til kring 120 tilsette per båt som kjem i arbeid. Havila Kystruten har teke over 350 tidlegare Hurtigruten-tilsette i samband med avtalen.

– Vi håpar å få flest mogleg av dei i arbeid. Og når vi får alle fire skipa i arbeid, så vil vi ha behov for å tilsette ein god del fleire. Vi håpar det blir mot slutten av året, eller starten av neste år, avsluttar Havila-direktøren.