Kvar blei det av Kina-effekten?

ANALYSE

I første kvartal i år sto salet til Kina for 1,4 prosent av Ekornes-konsernet si samla inntekt. Det utgjorde 13,7 millionar kroner.

Med over 1,4 milliardar kineserar var truleg forventningar til Kina-effekten større enn den så langt har blitt, då Ekornes fekk kinesisk eigar i 2018.

Qumei Home Furnishing Group, som no har eigd Ekornes i over fem år, driv både møbelhandel og møbelproduksjon. Konsernet har 850 møbelutsal i Kina og skal utvide med 500 nye innan fem år. I tillegg skal selskapet opne 1500-2000 såkalla butikk i butikken-utsal, der dei blir ein del av ein større butikk. Det skreiv Nett No i mai 2018, då Qumei Home Furnishing Group-grunnleggar Ruihai Zhao var i Sykkylven i samband med at bodet på Ekornes vart offentleggjort.

Utgangspunktet burde vere det aller beste.

– Å få ein raskare vekst i Kina vil vere veldig viktig, sa dåverande konsernsjef i Ekornes, Olav Holst-Dyrnes til E24 i samband med bodet.

Det er urimeleg å sjå berre på tala for 1. kvartal i år, som var eit uvanleg svakt kvartal i Kina, ifølgje 1. kvartalsrapporten til Ekornes.

Ser vi på tal for heile år er det likevel ikkje lett å sjå den store veksten i Kina.

I 2023 selde Ekornes møblar for 180 millionar kroner i Kina. Det året utgjorde møbelsalet i Kina 4,3 prosent av inntektene til Ekornes-konsernet og gjorde Kina til det åttande største marknaden for møbelprodusenten.

I 2019, første heile år etter eigarskiftet selde Ekornes møblar for 114 millionar kroner i Kina, som utgjorde 3,6 prosent av inntektene til Ekornes.

Rangert etter storleik er Nord-Amerika (Canada, USA og Mexico) den aller viktigaste marknaden. Der blei det seld Ekornes-møblar for 1,5 milliardar kroner i fjor og for 358 millionar kroner i 1. kvartal i år.

I tillegg til Kina er det Japan som tel i den asiatiske marknaden. Japan sto for tre prosent av inntekten til Ekornes i fjor.

Australia var like stort som Kina og Japan tilsaman i fjor.

Under koronapandemien fekk både Ekornes og heile møbelindustien ein kraftig oppgang, og mangel på arbeidskraft blei ei utfordring.

Frå 2019 til 2022 auka inntektene frå 3,2 milliardar, til rekordhøge 4,9 milliardar kroner. I fjor var boomen som vart skapt av koronapandemien over. Inntektene fall til 4,2 milliardar kroner og held fram med å falle i 1. kvartal i år.

Konsekvensen er mellom anna færre tilsette.

I 2022 hadde konsernet 2945 tilsette, 1266 av dei i Noreg, med Ekornes-fabrikkane i Sykkylven og på Grodås som dei viktigaste.

Ved utløpet av 1. kvartal i år var arbeidsstokken på 2662 tilsette, 998 av dei i Noreg.