– Handfast sirkulærøkonomi

Den 1997-bygde hurtigbåten Gabriele blei før sesongen bygd om for å oppfylle Tier 3-krava. Med nokre måneders erfaring kan Cruise Service slå fast at resultatet er blitt ein 2022-utgåve som er billigare i drift, og med mellom 40 og 50 prosent lågare forbruk av drivstoff.

– Handfast sirkulærøkonomi, seier driftsjef Trond Kongshaug ved Stadyard om ombygginga dei har utført for reiarlaget i samarbeid med fleire lokale bedrifter.

Ombygging meir aktuelt
Stadyard-verftet har stått for ombygginga og driftssjefen påpeiker at gjenbruk av fartøy er meir aktuelt enn nokonsinne. Slik er det mogleg å realisere meir miljøvennlege båtar til heilt andre prisar enn ved nybygg.

– Her går vi rett inn sirkulærøkonomien, og då er enkle utgangspunkt ofte dei med mest suksess, supplerer dagleg leiar Agnar Lyng ved Raudeberg-verftet.

Lyng påpeiker at verftet óg har erfaring med å bygge el-ferje, og det som var Norges første hybride fiskebåt.

Ser nye moglegheiter for verftet
Katamaranen Gabriele blei opprinneleg bygd ved Fjellstrand Verft, og berre ein av mange som kan vere aktuelle for ei tilsvarande ombygging.

Stadyard driv i utgangspunktet med reparasjon, vedlikehald og nybygg – men verftssjefen meiner denne marknaden er spennande.

– Det ligg nye moglegheiter i dette for Stadyard når dette blir ein suksess. Då vil fleire sjå at dette er ein kortare tilnærming til lågare utslepp, enn ein del av dei meir filosofiske tilnærmingane, seier Lyng.

Etter at båten vart totalrenovert innvendig, er skroget bygd om etter teikningar frå Marin Teknikk i Herøy. Volvo Penta dieselmotorar med låg vekt og IPS-løysing som gir betre komfort og er langt meir drivstoffgjerrige, er levert frå Weiberg Gulliksen i Ålesund.

– Ved hjelp av desse lokale leverandørane har vi klart å auke levetida på båten med kanskje 30 år, seier Holsvik.

Klargjort for hybrid og hydrogen
I dag er drivstofforbruket for Gabriele 40 til 50 prosent lågare enn tidlegare - med eit tilsvarande utsleppskutt.

Ved å ta i bruk nye teknologiar er målet ein reduksjon av utsleppa på 85-90 prosent i løpet av få år.

– Motorane er klare for hybriddrift og det neste steget er å sette inn ein elektromotor mellom maskinen og propellane. Slik kan segle utan utslepp på kortare avstandar. Båten er også tilpassa slik at den kan gå på hydrogen, eller ein miks av diesel og hydrogen, fortel Holsvik.

Fleire vil ha «grøne» motorar
Alexander Gulliksen hos Weiberg Gulliksen fortel at deira rolle i prosjektet har bestått mykje i å kalibrere alt til å passe om bord på Gabriele.

Motorleverandøren i Ålesund opplever auka etterspurnad etter «alt» av grøn teknologi og løysingar som kan spare drivstoff.

– Vi håpar at vi kan vere med å «repowre» fleire slike eldre hurtigbåtar. Etter dette prosjektet kjenner vi fallgruvene, og slike ombyggingar er ofte gode løysingar for reiarane, seier Gulliksen.