Ervik bygger nytt flaggskip

Ervik Havfiske på Stadlandet skal bygge eit nytt fiskefartøy som blir det største fartøyet i flåten.

Administrerande direktør Robert Ervik fortalde nyheita til elevane på Framflyt-konferansen i Måløy vidaregåande skule tysdag og saka blei først omtalt av Fjordenes Tidende.

Fiskebåten vil ha behov for to skift med sjøfolk – til saman 50 arbeidsplassar. Ervik synest det var kjekt å kunne sleppe nyheita om nye arbeidsplassar framfor Måløy-elevane.

– Grunnen til at vi ville fortelje nyheita til elevane, er at dei er viktige for framtida vår. Mange av desse går matros og fiske- og fangst-utdanning, og dei vil vere våre lærlingar og arbeidstakarar i framtida. Difor ville vi vise at vi sett pris på dei, fortel Robert Ervik til NETT NO.

Bygger truleg i Tyrkia
Det er ikkje gjort ein avtale med byggeverft, men Ervik stadfestar at det nye flaggskipet truleg blir bygd i Tyrkia, som dei siste fartøya deira. Venta levering for nybygget er mot slutten av 2023.

Det siste tilveksten til flåten, Argos Helena, blei levert frå Tersan-verftet i fjor.

Reiarlaget vil ikkje seie kva fiske fartøyet skal ut på, men avslører at nybygget blir 69,5 meter lang og 17 meter breitt. Fleire detaljar ønsker dei ikkje å gå ut med før ein presentasjon under Nor-Fishing-messa i Trondheim i august.

Brønnbåtsamarbeid
Under konferansen kunne også Ervik fortelje at dei skal samarbeide om å etablere eit nytt brønnbåtreiarlag saman med med Husøy Fiskeriselskap.

Ervik-konsernet har også eige sjømatdivisjon som blei starta i fjor og omfattar Måløyterminalen og ein fryseterminal.