Dobla omsetning for verftet

Då Nett No besøkte Green Yard Kleven-verftet denne veka kunne salssjef Karl Johan Barstad fortelje at fjoråret blei ein stor opptur.

Omsetninga vart kring enn dobbelt så høg som året før. I 2023 omsette verftet for 275 millionar og leverte eit driftsresultat på drygt 15 millionar. 

– Det er kjekt å sjå at tala aukar jamt og trutt oppover, og at vi ventar ei god botnlinje ved å drive berekraftig skipsbygging, seier han. 

Dei endelege tala blir lagt fram når rekneskapen er revidert. 

• I første versjon av denne saka skreiv Nett No at resultatet var dobbelt så høgt i 2024, som i 2023. Etter ny informasjon frå Green Yard blei artikkelen korrigert og endra fredag 28. februar klokka 15.23.

– Vi har fått full uttelling 
Green Yard-eigar og konsernsjef Hans Jørgen Fedog fortel at dei er nøgd med utviklinga av konsernet, og spesielt ved Green Yard Kleven. 

– Vi har fått full uttelling på vår berekraftige forretningsplan, opplyser han. 

Fedog fortel at dei også er i ferd med å lukkast ved Feda-verftet i Agder, der dei følgjer same oppskrift i samarbeider nært med sunnmørsverftet. 

– Vi trur framleis at det beste ligg framom oss, og gir gass kvar dag for å utvikle oss, legg han til.

– Nærast krig om kompetansen 
Med høgare aktivitet har verftet i utkanten av Ulsteinvik auka talet på tilsette. I dag er det kring 200 arbeidarar i sving innfor portane – og 80 av desse er eigne tilsette. 

– Vi har dei folka vi må ha, men skulle gjerne hatt fleire, fortel salssjef Barstad ved Green Yard Kleven. 

Salssjefen legg heller ikkje skjul på at det er tøff konkurranse om å rekruttere nok folk. 

– Det er nærast krig om kompetansen, spesielt på fagfolk og leiande stillingar som prosjektleiarar. All kompetanse som det ikkje er mogleg å leige frå utlandet, er vanskeleg å få tak på, seier han. 

Barstad fortel at dei likevel har klart å finne tilsette til stillingane dei har ønska. 

Tøffare konkurranse frå offentleg sektor
Barstad opplever at dei fleste bransjar opplever den same utfordringa, og at konkurransen frå offentleg sektor er blitt tøffare. 

Tilgangen på arbeidarar frå utlandet er også blitt knappare. Samtidig saknar han Taf-linja – ei praktisk retta industriutdanning på vidaregåande – som blei lagt ned ved den lokale vidaregåande skulen for nokre år sidan.

Han sett likevel pris på at dei har klart å behalde ein grunnstamme med folk som har vore ved verftet i lang tid. 

Får nybygg til kai rundt årsskiftet
Ombygging av tidlegare offshoreskip er mellom trendane som har gitt meir å gjere for Green Yard Kleven-verftet. 

I løpet av fjoråret hadde dei heile 28 oppdrag av ulike slag innan dette segmentet. 

Samtidig har resirkulering vorte ei lønnsam verksemd for verftet. 

I fjor signerte dei også den første kontrakten på eit nybygg sidan Green Yard tok over verftet i 2020.

Det er snakk om eit støttefartøy for ei ubemanna gassplattform i rumensk farvatn i Svartehavet. Skipet er designa av Marin Teknikk i Herøy.

– Skroget til nybygget er under bygging i Polen, og kjem til verftet i starten av 2026, seier Barstad – som legg til at dei heile tida reknar på nye oppdrag.