- Enorm kostnadsauke for bøndene

På grunn av dei høge straum- og gjødselkostnadene i 2021 og 2022 ber Bondelaget regjeringa love å kompensere ekstrautgifter i jordbruksoppgjeret i vår.

– Bøndene står framfor ein ny vekstsesong med enorm kostnadsauke og stor uvisse. Vi treng ei forsikring frå staten om at kostnadene skal kompenserast, og det raskt, seier leiar Bjørn Gimming i Norges Bondelag.

Hastemøte
Saman med Norsk Bonde- og Småbrukarlag ber no Bondelaget om hastemøte med Finansdepartementet, Olje- og energidepartementet og landbruks- og matminister Sandra Borch (Sp) for å drøfte moglege løysingar som skal avhjelpe den krevjande økonomiske situasjonen.

I møta vil bondeorganisasjonane ta opp at straumordninga må styrkast for landbruket.

Dei peikar vidare på at internasjonale sterke kostnadsauker rammar det norske landbruket, og at pengane som kjem i jordbruksoppgjeret, må komme tidsnok. Ifølgje Bondelaget har landbruksministeren allereie takka ja til å møte dei tysdag.