Folk ventar med store kjøp

(NPK-NTB-Kenneth Kandolf Haug): Nordmenn vil i dag verken hoppe i taket eller gå i kjellaren over økonomien, viser Finans Noregs barometer. Men folk ser eit svakt lys i enden av tunnelen.

Hushalda er forsiktig optimistiske om eigen økonomi, men også denne indikatoren ligg lågt i historisk samanheng, skriv Finans Norge i ei pressemelding.

Medan den sesongjusterte hovudindikatoren ligg på -14,4, er indikatoren for eigen økonomi for siste år på -10,4 og for neste år på 15,7.

Det betyr at folk har meir tru på neste år enn dette året.

Folk ventar med store kjøp
Samtidig er det litt meir pessimisme knytt til større og dyre kjøp, noko administrerande direktør Kari Olrud Moen i Finans Norge tilskriv at det framleis er uvisse om renta.

Men folk trur altså at det skal gå greitt i det daglege.

– Renteaukane kom nok som eit sjokk for hushalda, men indikatoren viser at hushalda har klart å justere eigen økonomi for å ta høgd for både prisauke og renteauke, seier Moen.

– No er trua på eigen økonomi på veg oppover igjen.

Ikkje lenger annleislandet
Hovudindikatoren til forventningsbarometeret rasa i 2022, det kraftigaste fallet sidan målingane starta i 1992. Årsaka var etterverknadene av koronapandemien, brå prisstigning og renteaukar.

Det nivået ein ligg på no, svarer det til ein såg under pandemiåra.

Finans Norge merkar seg at nordmenns økonomiske forventningar no følgjer snittet i EU i mykje større grad enn før. Talet som svarer til hovudindikatoren i EU, ligg på -18,6, medan den norske altså ligg på -14,4.

– Mykje tyder på at vi ikkje lenger ser på Noreg som «annleislandet» der alt går bra nesten uansett av kva som har skjedd ute. Det trur vi norske hushald i aukande grad tek inn over seg, seier Moen.

Dei borgarlege har mindre tru på landet
Forventningsbarometeret måler norske hushalds forventningar til eigen og økonomien i landet. Det er gjort i samarbeid mellom Finans Norge og Verian Group og blir justert for trend og sesong etter tilrådingar frå Noregs Bank og andre aktørar.

Målinga for 4. kvartal er teken i perioden 31. oktober til 6. november.

Dei fleste som har svart, fekk altså ikkje med seg Donald Trumps siger i presidentvalet i USA, som er venta å få fleire konsekvensar for internasjonal økonomi.

Borgarlege veljarar har mindre tru på landet

– Det er eit stort sprik mellom vurderinga av landets og eigen økonomi det siste året. Vurderinga av økonomien i landet er veldig låg og kan komme av at det er meir krevjande å få oversikt over økonomien samla sett enn eigen økonomi i ei tid med store endringar, seier sjeføkonom Kyrre Knudsen i Sparebank 1 Sør-Noreg.

Indikatoren viser elles større skepsis blant borgarlege veljarar enn raudgrøne veljarar til økonomien i landet, medan raudgrøne veljarar har mindre tru på eigen økonomi enn dei borgarlege.

(©NTB)