Får med investorar på mineraljakt

Technipfmc, Wilhelmsen-reiarlaget og Norsea-konsernet går inn i selskapet Loke Minerals, der sunnmøringen Hans Olav Hide er styreleiar.

- Vi er kjempefornøgde med at vi har fått med oss så sterke partnarar med kunnskap, teknologi og internasjonalt nettverk, fortel Hide til NETT NO.

Den utflytta gjerdsvikaren utgjer saman med Walter Sognnes og Tore Halvorsen trioen som står bak selskapet med adresse i Stavanger.

Kapitalutviding på 110 millionar
Loke Minerals satsar på mineralutvinning på havbotnen, og jobbar med ei kapitalutviding på 110 millionar kroner.

Technipfmc, Wilh. Wilhelmsen-reiarlaget og Norsea Group vil gå inn med til saman 85 millionar, ifølgje ei pressemelding frå partane. Når kapitalinnsprøytinga er fullført, vil Technipfmc og Wilhelmsen også ta plass i styret.

- Dette er eit veldig viktig steg vidare for selskapet, som kan sette i gong neste spennande fase, fortel Hans Olav Hide.

(saka held fram under)

Tror på ny eksportindustri
Loke Mineral blei starta i 2019 og tek sikte på å bli ein leiande aktør i det som kan utvikle seg til ein ny stor industri.

- Olje -og gassindustrien har ein basiskunnskap og teknologi som veldig langt på veg kan danne basis for slike gruver. Dette har vi ein unik moglegheit til å bygge ut i Norge, og bli verdsleiande på, sa Hans Olav Hide i eit intervju med NETT NO i vår.

Ein rapport frå Rystad Energy viser at mineral frå havbotnen kan gi grunnlag for ei næring med ei årleg omsetning på nær 180 milliardar kroner i løpet av dei neste tiåra. Det er meir enn dobbelt så høgt som moglegheitene som er antyda for havvindindustrien.

Miljømotstand
Regjeringa avslutta i april ei høyringsrunde om korleis det kan bli opna for leiting. Den viste at motstanden mot mineraljakta er stor i miljørørsla.

Hide er derimot overtydd om at det er mogleg å finne berekraftige måtar å drive på.

- Vi tek ikkje nokre snarvegar og skal klare å løyse dette, sa Hide i det same intervjuet.