Krevjande arbeid med smittevern og testing

Frå måndag sette Vard i verk ein plan for å opne verftet i Brattvåg gradvis, etter at det blei stengt mot slutten av førre veke. Tysdag var dei kring 50 personar på jobb innafor portane.

– Vi startar forsiktig med å ta inn folk som jobbar på stader der eit fåtal personar er til stades, og risikoen for at det har vore smitte er liten, fortel kommunikasjonssjef Hege Anita Akselvoll i Vard til NETT NO.

Verftskonsernet har eit apparat med eigne tilsette og dedikerte fagfolk som jobbar for å følgje opp smittevern og testing.

– Det er ganske mange personar som jobbar med dette. Vi har også nytta mykje tid på å tenke proaktivt og vere i forkant med å vurdere kva vi kan gjere om vi blir råka av ulike scenario. Hovudmålet er heile tida å ta vare på folk si helse og lokalsamfunnet, samtidig som det er viktig å halde hjula i gong i prosjekta, fortel ho.

Mange blir testa på nytt
Dei siste dagane har Vard på eige initiativ testa kring 360 arbeidarar berre ved Brattvåg.

– For å handtere testinga i Brattvåg og logistikken rundt har helseteamet bestått av tre personar og ein ressurs frå Medi3. Dei gjer ein formidabel jobb, og fredag formiddag testa dei heile 325 personar, påpeiker Akselvoll.

Som eit ekstra sikkerheitstiltak, skal no mange av arbeidarane på Brattvåg bli testa ein gong til, før det etter kvart blir normal aktivitet ved verftet att.

Eigne team ved verft og alle spesialselskap
Vard har oppretta eigne «emergency response team» ved hovudkontoret, på alle verfta og ute i dei ulike spesialselskapa.

For å handtere situasjonen ved Vard Brattvaag dei siste dagane, har teamet ved verftet handtert prosessen - og spelt på lag med andre ressursar i konsernet.

– Vi har etablert eit godt beredskapsteam sentralt og ute på lokasjonane, og ikkje minst har vi eit godt støtteapparat kring arbeidet, fortel Akselvoll.

I tillegg til at dei har tett dialog med lokale helsestyresmakter, har dei engasjert eige helseteam som har jobba for Vard i meir enn eitt år, og dei samarbeidar med Medi3.

– Dette støtteapparatet hjelper oss med testing, logistikk og vurderingane som blir gjort, fortel Akselvoll.

Arbeidslag, munnbind og inngangskontroll
Beredskapen blei trappa opp allereie før koronapandemien nådde Norge for meir enn eitt år sidan.

Akselvoll fortel at dei heile siste året hatt eit omfattande smitteforebyggingsprogram, som kontinuerlig har vore tilpassa situasjonen i Norge og utviklinga i verda.

– No har vi enno meir merksemd om å dele folk i mindre arbeidslag, vi har påbod om munnbind - uavhengig av om ein kan halde ein eller to meters avstand – og endå strengare inngangskontroll, fortel kommunikasjonssjefen.

Vil teste fleire framover
I tillegg til å teste arbeidarane, bistår konsernet den kommunale smittesporing og held mange nærkontaktar i karantene.

- Som ein konsekvens av økt smitte i regionen, tek vi no også fleire interne testar framover. Det er viktig å oppdage moglege tilfelle tidleg, legg Akselvoll til.

Ho ser ikkje vekk frå at det kan vere aktuelt med fleire tiltak framover, avhengig av smitteutviklinga i regionen.