Måtte svare om mineraljakt til havs

Per Espen Stoknes som representerer Miljøpartiet Dei Grøne på Stortinget, ville ha svar frå energiministeren, om korleis regjeringa vil sikre at mineralutvinning på havbotnen, ikkje er med å øydelegge verdifulle økosystem.

Den Oslo-busette ålesundaren viser til at ei samla miljørørsle stilte seg svært kritisk til at regjeringa vil opna områder for slik leiteverksemd.

– Vil få eit godt beslutningsgrunnlag
Stoknes fekk svar på sitt skriftlege spørsmål i Stortinget måndag.

Her viser energiminister Tina Bru (H) til at den pågåande prosessen også inkluderer konsekvensutgreiing. Det arbeidet skal i tråd med med lova om mineral på havbotnen, vise kva konsekvensar slik verksemd kan føre til.

– Det pågåande arbeidet legg til rette for at vi vil få eit godt beslutningsgrunnlag for å ta stilling til opninga av områder for havbotnmineralverksemd, seier Bru.

(saka held fram under)

Kan gi stor verdiskaping
Statsråden påpeiker at gruveverksemd på havbotnen kan ha stort potensiale til ny verdiskaping og sysselsetting framover – og kan bli ei «ny, viktig havnæring», påpeikar Bru.

Ein rapport frå Rystad Energy viser at mineral frå havbotnen kan gi grunnlag for ei næring med ei årleg omsetning på nær 180 milliardar kroner i løpet av dei neste tiåra. Det er meir enn dobbelt så høgt som moglegheitene som er antyda for havvindindustrien.

Dei mest optimistiske anslaga for sysselsettinga frå mineralutvinning, viser ifølgje rapporten at det kan bli skapt meir enn 20.000 nye jobbar i næringa her til lands.

– Må finne berekraftige måtar
NETT NO har tidlege omtala korleis det ligg an til å bli ein hard politisk dragkamp om korleis – og om ein overhovudet skal – opne for mineraljakt på norsk sokkel. Motstanden er stor blant både miljøvernorganisasjonar, forskarar og fiskeriinteresser. Mellom anna Miljødirektoratet meiner det allereie er behov for å dra i bremsa.

Samtidig er det store økonomiske interesser på spel for bedrifter, som gjerne vil bli ein del av denne verdikjeda.

– Ingen ønsker å gjere ting som er skadeleg for miljøet. Vi må finne berekraftige måtar å gjere dette på. Vi tek ikkje nokre snarvegar og skal klare å løyse dette, uttalte den utflytta sunnmøringen Hans Olav Hide, i eit intervju med NETT NO førre månad.

Han er styreleiar og medeigar i Loke Minerals og mellom dei som ser store moglegheiter for framveksten av ei ny maritim næring.