Optimar varsler permitteringar

Optimar har sendt ut varsel om permittering for 65 tilsette i produksjonen på Valderøya og Stette.

Årsaka er usikkerheit som følgje av krigen i Ukraina og sanksjonar mot Russland, ifølgje NRK Møre og Romsdal, som først omtalte saka.

– Bildet veldig uoversiktleg
Lene Flem Debess som leiar HR- og organisasjonsavdelinga, påpeiker til NETT NO at det dreiar seg om eit generelt varsel og at dei ikkje veit kor mange som eventuelt blir råka av permitteringar.

– Vi er påverka av sanksjonar og auka råvareprisar som mange andre. I dag er bildet veldig uoversiktleg og mange eksportbedrifter opplever dette som utfordrande, fortel ho.

Bedrifta leverer utstyr til fiskeindustrien både på land og til sjøs. Invasjonen har ført til uvisse i marknaden kring oppdrag framover. Optimar hadde i fjor nokre tilsette i serviceavdelinga ute i permisjon, men har elles hatt arbeid til selskapets 283 tilsette i Norge.

Storkontrakt i Russland

Mot slutten av 2020 opplyste Optimar at dei hadde sikra seg på i overkant av ein halv milliard kroner til åtte russiske fiskebåtar. Russiske fiskebåtreiarlag har vore inne i ei omfattande fornying av flåten, og Optimar skulle levere automatiserte fabrikkar.

NETT NO omtalte nyleg oppdraget Optimar hadde om bord på det nye flaggskipet til det russiske Okeanrybflot-rederiet. Georgiy Meshcheryakov er med sine 108 meter, den største tråleren bygd ved Tersan-verftet i Tyrkia. Om bord har Optimar levert den største filetfabrikken de har levert til en båt noen gang.

Etter to år med underskot gjekk Optimar med overskot i 2020, som er det siste offentlege rekneskapen. Betre prosjektstyring, streng kostnadskontroll og ein reduksjon i bemanninga - 25 i Noreg og 21 i Seattle i USA, blei oppgitt som årsak.

Selskapet er resultatet av samanslåinga av Optimar på Valderøya, Peter Stette i Skodje og Seaside på Stranda. Sidan 2017 har det vore eigd av det tyske Haniel-konsernet.