Overraska om Sulagondolen blir parkert

Tysdag avgjer kommunestyret i Sula om ideen om ein gondolbane til toppen av Sulafjellet skal bli putta ein skuff, eller ikkje.

Alternativet til å stoppe arbeidet med ein områdeplan, er å be kommunal og distriktsdepartementet trekke statsforvaltaren sine protestar – og gi grønt lys for planane.

Kommunestyremøte i Sula startar klokka 14 – Nett No følgjer møtet.

Vil stemme for å avslutte arbeidet
Tidlegare ordførar Jim Arve Røssevoll frå Arbeiderpartiet er mellom dei som meiner usikkerheitene er for mange og konsekvensane for store.

– Vi er ikkje nøgd med det som er kome på bordet, seier han til Nett No.

Partiet sine seks representantar i kommunestyret vil difor stemme for at det ikkje blir jobba vidare med planen. Dei har mellom etterlyst betre samfunnsøkonomiske analyser og meiner alternative løysingar i større grad burde vore vurdert.

– Vi meiner det er ei svak økonomisk analyse som ligg til grunn. Vi har sagt nei på bakgrunn av det vi veit om konsekvensar for bebuarar, naturmangfald og friluftsinteresser, i staden for å krysse fingrane for at ei positiv utvikling vi ikkje kjenner, seier Røssevoll.

– Finst mange andre moglegheiter
Dei økonomiske tala Røssevoll stiller spørsmål ved, kjem fram i ein rapport frå Menon Economics i 2022. Her blir det anslått ein prislapp investering på kring 600 millionar og ei årleg verdiskaping på 47 millionar kroner etter oppstartsfasa.

– Eg finn det vanskeleg å sjå korleis det er mogleg å finansiere ei slik investering – som sikkert også blir dyrare – med nokre få millionar kroner i overskott, seier han.

Røssevoll er også skeptisk til tempoet i den politiske saksbehandlinga og mengda med dokument kommunestyrepolitikarane må sette seg inn i på kort tid.

– Eg meiner finst mange andre moglegheiter til å skape nytt liv på Devoldfabrikken. Ein kan bygge eit 60 meter høgt tårn med restaurant på toppen - og mykje anna – som ikkje gir like store konsekvensar, seier han - og påpeiker at ideen om eit tårn er meint litt humoristisk.

Trur prislappen blir høgare
Ap-politikaren fortel likevel at han blir overraska om eit fleirtal i kommunestyret går inn for å stoppe saka tysdag. Hans tips er eit betydeleg fleirtal for å gå vidare.

Det er også håpet til Terje Devold som jobbar med å realisere planen på vegner av Flakk-konsernet. Han fortel at tala frå Menon-rapporten framleis står seg – men at prislappen truleg blir høgare enn 600 millionar.

– Vi må nok iallfall 100 millionar opp, seier Devold til Nett No.

Meir konkret kan han ikkje vere for augneblinken, og legg til at han mellom anna er spent på utviklinga i stålprisane. Med andre ord er det snakk om ei investering på minst 700 – og kanskje 800 millionar kroner.

Bakgrunn:

Mål om 150.000 besøkande årleg
Det vil i tilfelle vere snakk om den største reiselivsinvesteringa som er gjort i regionen nokon gong. Devold er trygg på at det vil lønne seg.

– Når vi reknar på omsetning, driftskostnader og kapitalbehovet, så er vi veldig trygge på investeringsnivået, seier han.

Målet er 150.000 besøkande årleg, fortel han.

Til samanlikning hadde Loen Skylift i Stryn 110.000 besøkande årleg dei fem første driftsåra. Prislappen var også betydeleg lågare – kring 330 millionar kroner då anlegget opna.

– Vi har relativt låge variable driftskostnader og når vi bikkar eit visst tal på brukarar årleg, så har vi god lønnsemd, seier Devold om prognosane for Sulagondolen.

Tysdag ettermiddag kjem svaret på om planane kjem eit skritt nærare realisering – eller må rykke tilbake til start.

Kommunestyremøte i Sula startar klokka 14 – Nett No følgjer møtet

Les saksutgreiinga (ekstern lenke)