Stor uvisse hos leverandørlokomotiv

Utstyrsleverandøren MMC First Process har vore mellom dei raskast veksande bedriftene på Nordvestlandet dei siste åra.

No opplever dei svikt i delar av marknaden. Det er i første rekke eitt av fire forretningsområde - processing - som opplever svikt.

– Fleire prosjekt blir stoppa opp og skyvd ut i tid. Per i dag har vi ingen kanselleringar, men det er stor usikkerheit i marknaden for alle i leverandørindustrien - og vi veit ingenting om når det vil kome i gong igjen, fortel administrerande direktør Petter Leon Fauske i MMC First Process til NETT NO.

Bedrifta som mellom anna leverer utstyr til handtering av fisk i havbruksnæringa, har opplevd eit trendskifte i marknaden etter at regjeringa la fram sitt forslag om grunnrenteskatt for oppdrettsbransjen.

Tilsette informert på allmøte
Så seint som i september kunne selskapet melde at dei hadde signert oppdrag for 700 millionar. Førre veke blei dei tilsette informert på allmøte om at det kunne vere fare for oppseiingar.

– Vi har tatt ei ansvarleg vurdering for å sikre trygg drift, og vart nøydde til å gjere endringar i selskapet. Dette har ført til ei justering på ni stillingar. Det har vore ei krevande, men god prosess takka være samarbeidet med dei tilitsvalde og tilsette. Per i dag har vi funne løysing for åtte av dei ni berørte tilsette, fortel Fauske.

– Med andre ord er det éin person som kan bli sagt opp?

– Det er uavklart, seier Fauske og forklarar at vedkomande har fått eit tilbod om ei anna stilling.

Oppbemanningsplanar lagt i skuffen
MMC First Process har avdelingar på Digerneset og Mjølstadneset på Sunnmøre. Til saman er dei kring 225 tilsette og auka bemanninga med 26 prosent i fjor.

Planane om å auke bemanninga med fleire titals tilsette årleg, er inntil vidare lagt i skuffen.

– No tek vi ein fot i bakken og omfordelar ressursane i selskapet. Så håpar vi det kjem ei tydeleg justering av forslaget til grunnrenteskatt, seier han.

– Det er mykje som er meir uoversiktleg enn tidlegare, men eg har framleis trua på framtida for både selskapet og bransjen, legg Fauske til.

Tørke for nye kontraktar
MMC First Process er ei av dei sentrale bedriftene i GATH-nettverket, som førre veke møtte Ap-politikar Per Vidar Kjølmoen. Då kunne selskapa opplyse at fleire av dei hadde kontraktar for hundrevis av millionar, som var sett på vent og at dei frykta dei første nedbemanningane før jul.

Dei kunne også fortelje at det ikke var inngått kontraktar av større verdi for nokre av leverandørselskapa, i perioden etter forslaget om grunnrenteskatt var lagt fram.

Då hadde Optimar allereie varsla oppseiingar av opptil 40 tilsette fordi fleire oppdrag var sette på vent grunna Ukraina-krigen.