Ukjende selskap får store millionbeløp

Innovasjon Norge har aldri gitt meir pengar i støtte til norske bedrifter, enn dei gjorde i fjor. Ein gjennomgang av lista med reine tilskott til bedrifter på Nordvestlandet, viser at også fleire ukjende selskap har fått betydelege midlar.

Pengane skal nyttast til alt frå landbasert oppdrett i Vågsøy og teknologiutvikling i Volda, til skjellsanking på havbotnen utanfor kysten. Felles for selskapa er at det står kjende selskap eller ansikt bak satsinga.

Sjå bedriftene med størst tilskot under

Erlebygg med adresse i Herøy og kontor i Ulsteinvik, er mellom bedriftene som ikkje har stukke seg fram i særleg grad.

Med 15 millionar i tilskot i fjor, er dei på ein delt «pallplass» på tilskotslista til Innovasjon Norge på Nordvestlandet. Selskapet fekk også drygt fem millionar i tilskot året før.

– Draghjelpa vi har fått frå Innovasjon Norge er heilt fantastisk. Utan den hadde vi aldri vore her vi er i dag, fortel Leif Gjelseth til NETT NO.

Ny byggemetode for hus

Den tidlegare MMC-gründeren er mannen bak ideen Erlebygg jobbar med. Han fekk tidleg med seg Georg Grimstad til å utvikle ideen vidare. Grunna patentarbeid held selskapet førebels korta tett til brystet. Det dei kan fortelje gir likevel grunn til å vekke nysgjerrigheita.

Kort fortalt dreier det seg om ein ny byggemetode for hus. Og andre ting sjølvsagt. Og dei har fått ein solid partnar på laget.

– Vi samarbeidar med Mestergruppen, som også er inne som aksjonærar. Dei skal stå for marknadsføring sal og oppføring av husa - om målsettinga blir nådd, fortel Gjelseth.

Mestergruppen er mellom dei største bustadbyggarane i Skandinavia og sett årleg i gong 3000-4000 bustader i året.

– Vi føler oss ganske heldige som har fått med ein slik aktør, legg han til.

(saka held fram under)

–Kan samanliknast med Lego
Ambisjonane er store, men først litt om kva Erlebygg eigentleg jobbar med. Georg Grimstad, som også leiar arkitektselskapet Bucci Arkitektur & Design - og er aksjonær i Erlebygg, forklarar:

– Det er eit byggesystem som kan samanliknast med Lego. Det er enkelt og kjedeleg i grunnforma, men kan utviklast til å bli noko frodig, fortel Grimstad.

Konstruksjonssystemet skal gjere det mogleg å demontere eit bygg, slik at det kan brukast opp att på same måte, eller ein ny måte. Sirkulærøkonomi er med andre ord eit hovudpunkt bak heile konseptet.

– Dagens byggemetode er basert på at ein skal skru, spikre, lime og «silikonere» seg fram til eit ferdig bygg på ein slik måte at det ikkje er mogleg å bruke opp att, påpeiker Grimstad.

Spreidt produksjon
Produksjonen av «byggeklossane» kan bli spreidt ulike plassar, og dei håpar at mest mogleg skal skje i Norge. Gründerane ser føre seg knutepunkt der «byggeklossane» blir samla og sette saman til nye element, gjerne nær byggeplassen.

– Vi jobbar i krysningspunktet mellom industri og byggfag. Det gjer at vi kan levere ein presisjon som gjer at vi kan bygge utradisjonelt, men likevel oppfylle alle lovkrav, legg Grimstad til.

(saka held fram under)

– Vil tilsette flest mogleg i lokalmiljøet
Leif Gjelseth er klar på at Erlebygg skal bli fleire enn dagens fire tilsette på Nordvestlandet.

– Erlebygg si oppgåve er å utvikle byggeklossane til systemet, og vi vil tilsette flest mogleg i lokalmiljøet, fortel han.

Gjelseth er svært nøgd med teamet som i dag består av fire fast tilsette. Han fortel at dei fekk inn kvalifiserte søkjarar, trass i at dei er eit nystarta selskap.

– Det er veldig kjekt å sjå. Vi har mellom anna ein del mekanisk ingeniørkompetanse på laget. Det er folk som er vande med å konstruere detaljar i eit krevjande miljø, påpeiker han.

Siktar mot eksportmarknaden

Satsingsområdet for oppføring av bustadene vil i første omgang vere Austlandet.

– Men vi har ikkje tenkt til å begrense oss. Vi vil utvikle oss både i andre delar av landet og om det går som vi trur, så vil vi ekspandere til utlandet, fortel Leif Gjelseth.

Første steg på vegen er å få ferdigbehandla patentarbeidet og gründerane håpar dei vil vere i mål med det innan utløpet av året.

(saka held fram under)

Tidlegare Google-topp med teknologisatsing
Volda-baserte Projectx er eit anna selskap på toppen av tilskotslistene, som dei færraste har høyrt om.Tidlegare Google-topp Tarjei Vassbotn er dagleg leiar for teknologiselskapet som fekk 15 millionar kroner frå fjorårspotten til Innovasjon Norge.

Ifølgje ei nettside som blei lansert i fjor, skal dei «finne opp ein ny måte for korleis mennesker, organisasjonar og datamaskinar jobbar saman».

Då nytta dei namnet Tagr, men det vert nok endra før vi er ferdige, fortel Vassbotn til NETT NO. Elles vil han ikkje seie stort for augneblinken.

– Akkurat no kan vi ikkje seie meir om kva vi held på, men om ikkje så lenge så skal vi fortelje kva vi skal gjere og kven vi er, legg han til. Selskapet blei stifta i desember 2020. I tillegg til Vassbotn er Grim Hegland Iversen og Olav Sindre Kriken med på eigarsida.

Mest til skjellsankarar
Tau Tech er på toppen av tilskottslista over bedriftene som fekk støtte på Nordvestlandet. Dei fekk tilsagn om 18,5 millionar kroner i fjor.

Seinast i helga blei det kjent at Ålesund-selskapet har henta inn 300 millionar til saman i ny kapital, bankfinansiering og offentlige tilskot.

Måndag blei det også kjent at dei har finansieringa på plass for å bygge om det tidlegare offshoreskipet Ocean Duke (før det Island Duke, journ. anm.). Fiskerstrand verft skal gjere jobben og skipet skal vere klart til prøvesanking til hausten.

Sjå bedriftene med størst tilskot under

NETT NO har tidlegare omtala Ålesund-selskapet som består av ein rekke gründerar. Dei har planar om å få i gong fiske etter haneskjel – som blei stoppa for fleire tiår sidan grunna hardthendt fiskemetoder.

Ved hjelp av kamera og lys meiner Tau Tech dei har funne ein måte å fangste skjella på som er skånsam både for botn og skjellbestanden. Med kamerateknologien kan fiskereiskapen sjå og og styre plukkinga av skjella på botnen, ved hjelp av sugekraft.

Nest mest til Vågsøy-selskap
Vågsøy-selskapet Onshore Technologies er på 2. plass av bedriftene i nordvest som fekk mest tilskot frå Innovasjon Norge i fjor (sjå lista under).

Dei fekk 17 millionar kroner som eit ekstraordinært koronatiltak for å starte landbasert oppdrett gjennom selskapet OFS Måløy.

Trond Inge Kvernevik leiar selskapet som er i full gong med å bygge sitt første pilotanlegg for ved Barstadvika mellom Måløy og Raudeberg. OFS (Onshore Farming Solutions) er største eigar i selskapet, som har med eit konstortium av lokale bedrifter på laget.

Selskap som fekk størst tilskot fra Innovasjon Norge i nordvest:

(gjeld tilbod om finansiering gitt i 2021- ikkje alle selskapa på lista har teke i mot tilskotet enno)

• Tau Tech 18,5 millionar (ekstraordinært koronatiltak)

• Onshore Technologies (OFS Måløy) 17 millionar (ekstraordinært tiltak)

• Projektx 15 millioner (ekstraordinært tiltak)

• Erlebygg 15 millionar (ekstraordinært tiltak)

• ÅKP 15 millionar (ulike tildelingar i klyngeprogrammet)

• Nofence 13,7 millionar i to ulike tilskot (og 15 millionar i lån)

• Nordvestvinduet 13 millionar (distriktsutviklingstilskot og koronatiltak)

• Autility 10,8 millioner (ekstraordinært koronatiltak)

• Ulmatec Handling Systems 8,75 millioner (ekstraordinært tiltak – pluss like mye i lån)

• Efee Induction 6,5 millionar (ekstraordinært tiltak)

• Volstad Maritime Dis I 6,5 millionar i tilskot maritime næring

• XL Food Company 5 millionar (ekstraordinært tiltak)

• Hotel Union Geiranger 5 millionar (ekstraordinært tiltak)

• Skipsteknisk 5 millionar (innovasjonstilskot)

(kjelde Innovasjonnorge.no)