– Vi ønsker å få til noko vidare

Konkursen i Prodtex Industri i Vanylven kom som eit sjokk på lokalsamfunnet på søre Sunnmøre denne veka. Førebels er det for tidleg å seie noko sikkert om kva som skjer med den store industrihallen på Fiskåholmen – og meir jobb for dei 31 tilsette – framover.

Styreleiar Kjersti Kleven i det konkursråka selskapet legg likevel ikkje skjul på at dei har håp om å få til ny drift – i ein eller anna form.

– Det vil vere ønskeleg å få til noko vidare, seier ho til Nett No.

– Vi har bygd opp ei unik kompetanse i dei som har jobba for oss. Det vil vere synd om den gjekk tapt, legg ho til.

– Må gjere nye vurderingar
Dei 31 tilsette er formelt oppsagt. Vidare vil det berre vere ei fåtal tilsette som vil vere i arbeid på Fiskåholmen for å sikre verdiar og utstyr.

– Dette er synd for både dei tilsette og kreditorane som tapar pengar. Det beklagar vi veldig, seier Kleven om situasjonen.

Samtidig påpeiker ho at det er bygd opp eit bra anlegg – som har størst verdt med dei tilsette.

– Teknologien og konseptet med design og produksjon basert på stor grad av automatisering, har vi absolutt tru på, seier ho.

– Vi må gjere nye vurderingar. Ein ting er vilje, men ein må også ha evne til å ta til på nytt, legg ho til.

Morselskapet blir råka indirekte
Dagleg leiar Sigbjørn Nordstrand ga uttrykk for tilsvarande då Nett No snakka med han etter konkursen.

Han er framleis dagleg leiar for morselskapet Prodtex As med adresse i Ulsteinvik. Der ligg teknologien som selskapet har utvikla, og nytta til produksjonen i Vanylven. Ulsteinvik-selskapet er ikkje direkte råka av konkursen.

– Det er likevel eit gjensidig kunde og leverandørforhold, som gjer at dei blir påverka, seier styreleiar Kleven.

Ei rad med uheldige omstende
Årsaka til at Prodtex Industri ikkje såg noko anna val enn å melde oppbod, var eit oppdrag med å bygge store stålmerdar.

I rettspapira kom det fram at selskapet då hadde kring 162 millionar i gjeld, og knappe halvparten i verdiar.

Styreleiar Kjersti Kleven fortel at ei rad med uheldige omstende, førte galt av stad.

– Det starta med at materiale var forseinka, som ein gjorde tiltak mot. Så kom andre problem som saman blei kostnadsdrivande. Fleire uheldige effektar etter kvarandre ga ein dominoeffekt og ein dramatisk høgare kostnad i prosjektet, fortel ho.

Ho fortel at oppdraget var på sida av strategien med høg automatiseringsgrad, men at selskapet tok oppdraget ut frå god timing med eit hol i produksjonen. Dei store stålmerdane var designa av Seafarming Systems, og skulle leverast til Lerøy-konsernet.

Har pant i eigedomen
På spørsmål kva som skjer vidare med dei tilsette, industrihallen og utstyret, viser bustyrar Espen Rekkedal til leiinga i selskapet.

I dag er det panthavarane som har kontroll over eigedommen på Fiskåholmen, og ein eventuell dialog skjer gjerne direkte mellom kreditorar og eventuelle interessentar.

Finanswatch skreiv tidlegare i veka at Sparebank 1 pant i buet på 240 millionar, men eksponeringa er langt lågare.

– Vi har i tillegg 50 prosent avlasting frå Eksfin av vår eksponering, samt delt prioritet med Innovasjon Norge i driftstilbehøyr og fast eigedom, opplyste Sparebank 1 SMN-advokat Roy Henning Haddal til nettstaden.