Aurstad-dom tilbake til lagmannsretten

- Vi er tilfreds med kjennelsen, seier Cato Aurstad sin advokat, Vegard Aaløkken.

Cato Aurstad vart i mai 2020 dømt til eitt år og ni månaders fengsel av tingretten. Aurstad er største aksjonær i Aurstad-konsernet og arbeider i selskapet.

Utgangspunktet for straffesaka var salet av maskinparken frå entreprenørselskapet K.A. Aurstad i oktober 2018 til søsterselskapet Aurstad Maskinutleige, omlag to månadar før det blei opna konkurs i K.A.Aurstad.

Økokrim meinte salet vart gjort til langt under marknadspris, til ugunst for kreditorane, og at Cato Aurstad både hadde ansvaret og var klar over underprisen. Det var dommarane i tingretten samde i.

Aurstad er usamd i dommen og anka, men ankeutvalet i lagmannsretten avviste å ta den opp til ny behandling.

Medhald i Høgsterett
Aurstad anka avgjerda til lagmannsretten til Høgsterett, som i dag har avgjort av Lagmannsretten må vurdere anken på nytt.

Høgsterett meiner ankeutvalet i lagmannsretten ikkje gjorde ei reell overprøving av av dommen mot Aurstad då anken vart avvist. Det er ein sakshandsamingfeil og difor må lagmannsretten behandle saka på nytt.

Den nye behandlinga kan gi to utfall, at anken blir avvist ein gang til eller at saka blir tatt opp til ny behandling i lagmannsretten.

Vann sivil sak
Høgsterett sitt vedtak i straffesaka mot Cato Aurstad kjem like etter at Høgsterett har handsama ei sivilsak i samband med konkursen i K A Aurstad.

Der var dommen at advokatselskapet DLA Piper var ansvarleg for råd i samband med den omstridde transaksjonen då maskinparken vart seld. Det var i samsvar med dommen frå tingretten, og den motsette konklusjonen som lagmannsretten kom med.

Den sivile saka skal no gjennom ei ny runde i lagmannsretten for å avgjere om advokatselskapet også skal betale erstatning, men denne gangen med utgangspunkt i at advokatselskapet hadde eit ansvar for transaksjonen.