Ein av fire er mot å endre sjukelønna

(NPK-NTB). Nesten fire av ti nordmenn er positive til å justere dagens sjukelønnsordning, ifølgje ei undersøking frå Opinions samfunnsmonitor.

Berre 25 prosent er negative, medan resten anten svarer verken-eller, eller «veit ikkje».

I desember braut forhandlingane om ny IA-avtale saman, og den gjeldande avtalen stansar ved årsskiftet. Då IA-avtalen vart inngått for 23 år sidan, var målet å kutte sjukefråværet med 20 prosent. Det målet er ikkje nådd, og sjukefråværet er no på sitt høgaste sidan svineinfluensaen for 15 år sidan.

LO avviser alle endringar av sjukelønnsordninga og krev at ordninga vi har i dag, blir freda dei neste fire åra. Arbeidsgivarsida representert av NHO meiner alt må kunne diskuterast for å snu utviklinga i sjukefråværet, og dei er berre villige til å frede ordninga i 18 månader.

Fleirtal seier nei til karensdag
Eit knapt fleirtal (51 prosent) trur at éin eller fleire karensdagar kan bidra til lågare sjukefråvær. Samtidig meiner 33 prosent at dette ikkje vil hjelpe, og 17 prosent er usikre. Dei yngste tviler mest på effekten.

Likevel støttar berre 32 prosent innføring av karensdag i Noreg. medan 50 prosent seier nei.

– Endringar i sjukelønnsordninga er kontroversielt, særleg tiltak som rammar arbeidstakarar. Forskinga er dessutan ikkje eintydig på at karensdag har effekt, seier seniorrådgivar Nora Clausen i Opinion.

Fem prosent har «juksa» i år
Annankvar arbeidstakar (49 prosent) seier dei trur at ein kortare arbeidsdag – som firedagarsveke eller sekstimarsdag – kan redusere sjukefråværet generelt, medan berre 23 prosent trur dette ville redusert deira eige sjukefråvær.

Undersøkinga viser også at fem prosent av arbeidstakarane har teke ein eller fleire sjukedagar i år utan å vere sjuke. Andelen er høgast blant dei yngste.

– Blant yngre arbeidstakarar seier éin av ti at dei har hatt sjukedagar utan faktisk sjukdom, og to av ti meiner det er greitt å bruke eigenmelding når ein er sliten, men ikkje sjuk, fortel Clausen.

Undersøkinga er gjennomført i Opinions samfunnsmonitor, i eit landsrepresentativt utval av befolkninga på 1000 personar, på nett i oktober og desember 2024.

(©NPK)