La fram nye teikningar for skipstunnelen

Kystverket fekk gode tilbakemeldingar under to folkemøte då dei la fram planar og teikningar for korleis utbygginga av Stad skipstunnelen kunne skje.

Det skriv NRK Møre og Romsdal.

Det var lokale folk i Kjøde og Moldefjorden som fekk presentert korleis det ville sjå ut og bli lagt til rette ved tunnelopningane

– Folk var ikkje skeptiske til det visuelle, og fleire sa at dersom det blei sjåande slik ut, så såg dei for seg eit stort utviklingsområde, seier kommunikasjonsansvarleg Sveinung Nedregotten til kanalen etter møta torsdag kveld.

Servicebygg og naturpark
Oppdraget til Kystverket i første rekke dreiar seg om å bygge ein skipstunnel dei kring 1,7 kilometrane gjennom fjellet.

Samtidig blir det lagt til rette på ulike måtar med eit parkområde for gapahuk/scene på nordsida og eit servicebygg i Moldefjorden.

Alt vil ikkje vere klart til opning, men målet er at områda kring tunnelen skal sjå ferdige ut og vere klargjort for oppsetting av fleire bygg og vidare utvikling.

Kan bli byggestart tidleg neste år
I løpet av året skal det lysast ut anbod på bygging av skipstunnelen, som truleg skjer over sommaren.

Prosjektet er planlagt utlyst som éin stor totalentreprise med fast pris.

Om det ikkje kjem store overraskingar kring prisen som kjem inn i konkurransen, er det venta at bygginga av tunnelen vil ta til tidleg neste år.