Mange byggjer i Danmark

(NPK-NETT.NO): Den maritime næringa i Noreg fryktar at verfta står i fare for å misse grepet om nybygg og mange norske reiarlag nyttar seg av danske verft.

Karstensens Skibsværft har i år sikra seg nesten like store norske kontraktar som alle norske verft til saman. På verftet ved Skagen ligg fiskefartøy under utrusting og reparasjon på rad og rekkje.

11 norske fiskebåtar i ordreboka
Ålesund-reiar Henning Veibust har tinga ein 75 meter lang ringnotsnurpar ved det danske verftet.

– Eg visste at produktet dei leverer er bra. Og når prisen er 40 millionar kroner, eller 12–13 prosent, lågare enn norske verft, var eg ikkje i tvil om valet, seier fiskebåtreiar Henning Veibust i Ålesund til Aftenposten / E24.

Karstensens Skibsværft skal byggje 11 norske fiskebåtar dei neste tre åra.

Slunken ordrebok hos norske verft
Ordreboka til det danske verftet står i sterk kontrast til situasjonen ved mange norske verft. Ifølgje bransjeorganisasjonen Norske Skipsverft har verfta i Noreg inngått kontrakt på 20 fartøy til ein samla verdi av 4,5 milliardar kroner i år.

NETT NO omtala nyleg korleis ordreinngangen er om lag halvert sidan i fjor. I heile 2021 blei det inngått 26 kontraktar for til saman 9,6 milliardar kroner. Nivået er ein brøkdel av toppnivået for åtte til ni år sidan.

Myklebust mellom dei utan nybygg
Ein del norske verft har ingen nybygg i ordreboka, blant dei Myklebust Verft i Sande. Verftsdirektør Lars Conradi Andersen meiner det er fare for at norske verft kan ende opp som service- og reparasjonsverft.

– Med særnorske reglar må vi konkurrere mot verft i land som brukar heilt andre ressursar på å byggje opp verftsindustrien sin enn det Norge gjer, seier han.