Møre og Romsdal dreg frå resten av landet

Møre og Romsdal har tidlegare vore på topp av landets fylker når det kjem til eksport per sysselsett. Ferske tal viser at det var slik også i 2023 – og fylket dreg i frå resten av landet.

– Forspranget som Møre og Romsdal har hatt på eksportinntekter per innbyggjar, har auka samanlikna med resten av landet, fortel administrerande direktør Håkon Haugli i Innovasjon Norge til NETT NO.

Lukkast betre enn resten av landet
Denne veka var Haugli på besøk i Ulsteinvik for å bli orientert om ulike verksemder i nærmiljøet.

– Møre og Romsdal fylke - og spesielt den maritime klynga - lukkast betre med det vi må lukkast med nasjonalt, enn det andre plassar i landet gjer, slår Haugli fast under besøket i Ulsteinvik denne veka.

Teknologiutvikling, grøn omstilling og eksport er områder han meiner næringslivet på Nordvestlandet er spesielt gode på.

– Desse tinga er folk «verdsmeistrar» på akkurat her vi er no, legg han til.

Besøkte Prodtex og Ulstein Verft
Under besøket fekk Innovasjon Norge-sjefen høyre korleis Prodtex hadde vekse fram. Dei satsar på produksjon av ulike stålkonstruksjonar som det vil vere store behov framover.

– Vi har fått støtte til å bygge opp ein fabrikk, og vi ser at kapasiteten og evna vi har opparbeida oss, gjer at vi kan produsere fleire produkt som er heilt nødvendig for å gjennomføre det grøne skiftet, seier forretningsutviklar Tore Roppen i Prodtex til NETT NO.

Seinast denne veka kunne dei fortelje om eit nytt samarbeid med Odfjell, om å lage understell for flytande vindturbinar.

Haugli fekk også tid til ein tur innom Ulstein Verft, for å sjå bygginga av det første av fleire serviceskip til vindkraftindustrien. Det har vore eit vekstområde for skipsbyggjarkonsernet i kjølvatnet av offshorekrisa og nedgangen i cruisemarknaden.

Mange underinvesterer i sal og marknad
Ein av grunnane til at Innovasjon Norge-sjefen ville ta turen til Nordvestlandet, er at han meiner resten av landet har noko å lære av landsdelen.

Ein gode eigenskap han meiner pregar næringslivet her i regionen, meir enn andre plassar, er evna til å kommersialisere verksemda.

– Stressless er framleis den mest kjente merkevara i verda. Vi ser at mange bedrifter underinvesterer, eller investerer for seint i sal og kompetanse på marknadsføring, seier han.

Haugli trekk fram både møbelindustrien og den maritime klynge, som eksempel på bransjar som har «auge og øyrer» i marknaden, og evnar å omsette kunnskapen til nye innovasjonar.