Sikra seg konsesjonar frå konkursbu

Selskapet Hofseth Aqua har sikra seg fire konsesjonar til å drive oppdrett av torsk i Storfjorden.

Det har dei gjort ved å kjøpe konsesjonane frå konkursbuet etter Purecod. Bustyrar Bjørn-Ivar Borgund fortel at Hofseth-selskapet fekk tilslaget for 325.000 kroner.

Vil drive lakseoppdrett
Roger Hofseth som er dagleg leiar og eigar av Hofseth Aqua, fortel at kjøpet har sikra seg konsesjonane og klarert lokaliteten.

– Vi håpar å få gjort om lokaliteten til laks i staden for torsk, seier Hofseth til Nett No.

Som kjent driv Hofseth med oppdrett av laks og aure – men ikkje torsk. Det er heller ikkje aktuelt skal vi tru Hofseth.

– Nei, akkurat no har eg iallfall nok å styre med, seier Hofseth - som mellom anna driv med oppdrett, foredling og eksport i Hofseth International-konsernet.

Kreditorane får truleg halv million
Oppdrett i regi av den nye eigaren skal i tilfelle skje der Purecod hadde planar om å drive, rett ved slektsgarden til initiativtakarar, Mikael Lade Rønes.

Selskapet hadde løyve til ein årleg produksjon på 5000 tonn torsk under optimale forhold.

Det var ikkje stort av verdiar i buet utover konsesjonane. Per i dag ligg det an til at kreditorane får kring ein halv million kroner til fordeling, ifølgje bustyrar Bjørn-Ivar Borgund.

Nokre av kreditorane har frist til starten av august med å godta, eller vil seie seg usamde i innstillinga frå bustyraren. Etterpå vil truleg konkurssaka bli sluttført.

Fleire konkursar
For Purecod-gründer Mikael Lade Rønes, har problema halde fram etter at draumen om oppdrett ved familiegarden i Storfjorden fall i grus.

Hovudselskapet til Rønes, Global As, blei slått konkurs i sommar. Bakgrunnen for konkursen er eit krav frå skattestyresmaktene på 3,2 millionar. Rønes har sagt seg usamd i kravet og anka avgjerda.

Rønes vart også slått personleg konkurs i vår, etter krav frå den Sveits-busette investoren Bjørn Apeland. Også denne konkursen var Rønes usamd i.