Trur avgjerd om forsvarsskip kjem før sommaren

I vår vedtok Stortinget vedtok ei storstilt satsing på militære skip til det norske forsvaret.

Innan få år skal det investerast i eit 30-tals fartøy av ulik storleik, og det er stor spenning i den maritime klynga på Nordvestlandet om kven som får jobben med å bygge.

Samtidig hastar det med å ta ei avgjerd, meiner forsvarspolitisk talsperson for Høgre, Hårek Elvenes.

– Vi har ikkje meir enn tida og vegen, sa han då maritime leverandørar i fredag møtte representantar frå forsvaret i Ålesund for å snakke om komande investeringar.

Elvenes trur avgjerda om ein flåteplan og val av leverandørar vil bli lagt fram før neste sommar.

– Viss ikkje, er vi i konflikt med det Stortinget har vedteke, la han til.

Skal byggje 30-tals skip
Ifølgje planen eit breitt fleirtal på Stortinget har vedteke, skal forsvaret bygge 10 havgåande og 18 mindre kystfartøy, i tillegg til fem fregattar.

For augneblinken jobbar forsvaret med å finne ut kva for krav dei skal stille og korleis oppdraga skal utformast.

Fredag hadde seksjonssjef for sikkerheit og beredskap, Knut Tore Otterlei, i Forsvarsmateriell Maritime Kapasiteter teke turen til Ålesund. Han tok opp korleis den maritime industrien kan tilføre meirverdi til forsvarsfartøya som skal byggjast.

– Det blir snakka mykje om skilnaden mellom sivile og militære regelverk, men eg meiner skilnaden ikkje er så stor når det gjeld sjølve materiellet. Det er sammensetning og omfang som ofte utgjer forskjellen, seier han til Nett No.

Trur dialog og samarbeid vil nøkkel
Otterlei trur tidleg dialog og samarbeid vil vere ein nøkkel for å kome fram til dei beste løysingane.

– Det må vere ein opning der vi kan pare vår kunnskap om militære behov med næringa sin kreativitet og kompetanse i utviklinga av gode løysningar, utdjupar han.

Det er tydeleg at bodskapen om samarbeid har nådd fram til dei 30-tals aktørane som hadde møtt opp ved Norsk Maritimt Kompetansesenter.

– Det kjem til å bli eit samarbeid, og vi er blitt oppmoda til det av styresmaktene, sa verftsdirektør Ronny Langset ved Vard Langsten.

Vard vil bygge fregattar i Norge
Bestillinga frå politikarane er standardiserte militære skip i ulike storleikar.

Når det gjeld fregattane – dei største skipa i planen – er Høgre-leiar Erna Solberg skeptisk til om den norske verftsindustrien har kompetansen som trengst for å bygge. Det kom fram i eit intervju med Nett No denne veka.

Langset i Vard vil ikkje gå inn i ein debatt med Solberg i media om kva verftskonsernet kan tilby, og viser til at dei skal presentere sine tankar om fregattbygging til forsvarsministeren og finansministeren i løpet av kort tid.

I kompaniskap med eigarane i Fincantieri – som skal bygge minst 20 fregattar for den amerikanske marinen – meiner Vard at dei kan bygge dei same fartøya i Norge.

Meiner det er plass til mindre aktørar
Arild Skoge frå Kongsberg Maritime var mellom aktørane frå bransjen som hadde innlegg undervegs.

Han understreka at samarbeid mellom dei maritime leverandørane vil vere avgjerande for at norske aktørar skal sikre seg oppdrag. Også mindre leverandørar bør få innpass til å levere utstyr saman med større bedrifter, meinte han.

Kongsberg har allereie innleia samarbeid med fleire ulike verft og leverandørar. Skoge meiner det er viktig at næringa får tid på seg til å snakke saman for å kome fram til dei beste løysingane.