Unge har dobla fondsparinga

Avgrensa moglegheiter til forbruk og lågare renter, har bidrege til å gi norske hushald meir pengar å spare under pandemien.

Aksjeporteføljene til norske hushald har nær dobla seg sidan botnpunktet i første kvartalet i fjor. Folk har òg sett meir pengar i banken under pandemien, viser ferske SSB-tal som kom denne veka.

Sparebanken Sogn og Fjordane er mellom dei lokale bankane som opplever den same utviklinga.

– Vi ser dei same trendane mellom våre kundar og har same auken mellom dei som sparar i fond, fortel bankdirektør Frode Vasseth til NETT NO.

Størst auke hos dei yngre
Sparebanken har sett kundane deira i aldersgruppa 18 til 29 år har auka sparinga mest – og dobla sparinga i aksjefond samanlikna med før pandemien.

– Det er eit godt teikn at yngre folk ser verdien i langsiktig sparing, legg bankdirektøren til.

Etter at pandemien slo til, såg sparebanken først ei auke i buffer hos privatkundane.

– I snitt auka desse innskota sine i banken med 7000-8000 kroner, fortel Vasseth.

Må ha råd til å tape
Sparebanken opplever at det er aukande interesse for å investere i enkeltaksjar.

Vasseth fortel at det mellom anna har vore «bra trykk» kring fleire av selskapa notert på Euronext Growth-indeksen. Aksjehandelsmarknaden utgjer er ein lågare terskel for notering for mindre selskap, enn hovdudindeksen på Oslo Børs.

– Vi anbefaler først og fremst investeringar i fond, men ein kan fint også spekulere i enkeltaksjar. Då er det viktig å hugse på det ein driv nettopp med spekulasjon – og at ein har råd til å tape investeringa, åtvarar han.

I løpet av 2020 blei heile 49 nye selskap notert på Euronext Growth. Mange av desse er omtala som vekstselskap – som også blir rekna som høgrisikoaksjar.

Nær ein firedel fleire eig aksjar
SSB-tala viser at 476.000 privatpersonar eigde børsnoterte aksjar ved utgangen av 2020 - 91.000 fleire enn året før. Det svarar til ei auke på meir enn 23 prosent.

Etter fallet i mars 2020 auka verdien på børsen i alle etterfølgjande månadene av året med unntak av september og oktober.

Behaldninga til hushalda i noterte aksjar følgde dette mønsteret. I andre kvartal 2021 var behaldninga til hushalda auka til 191,4 milliardar kroner – tilnærma ei dobling frå botnnivået året før. Auken i volum kjem i hovudsak av høgre kursar.

Kraftig auka i innskot
Koronapandemien har gitt ein ekstraordinær situasjon, og Statistisk sentralbyrå har ikkje tidlegare registrert tilsvarande store utslag som i denne perioden.

Trass den låge innskotsrenta har bankinnskota auka i heile landet. Mellom anna blir dette rekna som ei sikker plassering. Årleg auke i bankinnskot var mellom 3,9 og 5,7 prosent frå desember 2016 til februar 2020.

SSB reknar med at auken i innskot i første omgang har å gjere med avgrensa moglegheiter til forbruk, og i mindre grad har å gjere med ein usikker økonomisk situasjon.

For tidleg å slå fast varig endring
Nedstenginga i mars 2020 medførte ein kraftig auke i bankinnskot til norske bankkundar. Frå april 2020 til februar 2021 låg veksten på mellom 8,1 og 10 prosent.

I år to av pandemien minka veksten, men framleis er årsveksten mellom 6 og 7,6 prosent.

SSB går ut frå at veksten i bankinnskot vil falle i takt med gjenopninga av samfunnet, men meiner det er for tidleg å konkludere med om endringane i norske sparevaner er mellombelse eller varige.

Les meir om nordmenn sin spareadferd under pandemien (ekstern lenke)