Vitnar i søksmål mot tidlegare eigar

I førre runde av søksmålet mot den tidlegare eigaren av Kleven-verftet, slapp den lokale verftsleiinga å vitne. 

Når ankesaka neste veka startar opp i Gulating lagmannsrett i Bergen, står heile den tidlegare leiinga på vitnelista. 

Det er sett av 11 dagar til saka der konkursbuet etter at tre verftsselskap gjekk konkurs sommaren 2020, har gått til søksmål mot den tidlegare eigaren. 

Buet krevjar den kroatiske forretningsmannen Tomislav Debeljak og forsikringsselskapet Tryg for 136 millionar kroner i erstatning for tapa Kleven-verftet opplevde grunna konkursane. 

Det kom fram av sluttinnlegga til ankesaka. 

I tingretten blei kroaten frifunnen og dommen gjekk langt i å legge skulda for konkursane på bankane. 

Det er fleire nye namn på vitneliste til ankesaka som startar i lagmannsretten måndag 13. januar.

Dåverande administrerande direktør Kjetil Bollestad er mellom dei som er kalla inn frå begge partar.

Sentralt i saka er skuldingane mot Debeljak om at han handla aktlaust i drifta av Kleven-selskapa, på ein slik måte at han måtte rekne med at bankane sa opp sine avtaler. 

Før rettssaka er Bollestad knapp i sine kommentarar. 

– Eg har ikkje så mykje å seie bortsett frå at det er viktig å få fram fakta i heile saka, skriv han i ei tekstmelding til Nett No. 

Forholdet til eigaren skar seg
I tingretten kom det fram at forholdet mellom eigarane i Div Group og den lokale verftsleiinga skar seg etter at kroatane kjøpte verftet i utkanten av Ulsteinvik. 

– Eg vil ikkje, og kan ikkje, vere ein del av den operasjonen og kulturen som Debeljak er ein del av, sa Bollestad til Nett No etter at han hadde avslutta sitt arbeidsforholdet ved verftet.

Også tidlegare finansdirektør Ola Beinnes Fosse og hans etterfølgjar er kalla inn frå buet. 

Startar med partsforklaringar 
Saka startar med innleiingsforedrag frå begge partar. I løpet av den første veka i retten er det planlagt partsforklaringar frå bustyrar Bjørn Åge Hamre og Tomislav Debeljak. 

Den tidlegare verftsleiinga kjem truleg med sine forklaringar når saka startar opp måndag 20. januar etter at partane har hatt langhelg. 

Anfinn Fardal, som er burevisoren som har laga rapporten som står sentralt i saka, er mellom andre nye vitne lagmannsretten får høyre frå. 

Lokal leverandør, advokatar og banksjefar
Elles vil retten mellom anna få høyre frå Tor Marthin Sørli frå Hareid Group-selskapet, HG Teknikk, som var mellom leverandørane som jobba på Kleven-verftet etter eigarskiftet våren 2020. 

Fleire banksjefar og advokatane som var involvert – og forklarte seg i tingretten – er også ført opp på vitnelista til ankesaka. Buet har kalla inn 14 vitne til saman.

Dei saksøkte sine advokatar har ført opp ni vitne i alt. 

Tre av desse er også kalla inn av buet; tidlegare verftsdirektør Kjetil Bollestad, burevisor Anfinn Fardal og advokat Tor Herdlevær, som var advokat for Nordea og Innovasjon Norge.

Alt om søksmålet - få oversikt her

Div Group-vitner
For dei saksøkte skal både innkjøpsansvarleg, finansdirektør og sjefen for lovavdelinga i Div Group forklare seg. 

Mellom dei er Zoran Kunkera. Debeljak omtala han som «chief business officer», og som var mest til stades på verftet frå Div Group skal forklare seg i retten. 

Også Deloitte-advokat Peder Brøndmo som jobba for Div Group undervegs i prosessen med oppkjøpet av Kleven, er sett opp på vitnelista frå dei saksøkte sin side.

NETT NO gjer merksam på at Green Yard Kleven ikkje har noko med søksmålet å gjere, som omhandlar det tidlegare verftsselskapet på Kleven.