Refsar konkursbuet sitt arbeid med søksmål

Måndag 13. januar er det klart for ei ny runde i søksmålet mot den tidlegare eigaren av Kleven-verftet. 

Då møter den kroatiske forretningsmannen Tomislav Debeljak i Gulating lagmannsrett for å forsvare seg mot skuldingane frå konkursbuet etter at tre verftsselskap gjekk konkurs sommaren 2020. 

Den tidlegare verftseigaren er, saman med forsikringsselskapet Tryg, saksøkt for tapa . Det er sett av 11 dagar til saka i retten i Bergen. 

I tingretten blei kroaten frifunnen og dommen gjekk langt i å legge skulda for konkursane på bankane. 

Står på kravet om 136 millionar 
Nett No melde før årsskiftet at konkursbuet har skifta advokatar sidan sist. Taktikken er framleis den same, går det fram av sluttinnlegga til partane. 

Advokatane frå  Wikborg Rein meiner Debeljak og forsikringsselskapet saman bør dømmast til å betale 136 millionar kroner i erstatning for tapa Kleven-verftet opplevde grunna konkursane. Det går fram av deira sluttinnlegg til ankesaka. 

Summen er den same som kravet i tingretten. Det same er argumentasjonen. 

Konkursbuet meiner Debeljak handla aktlaust i leiinga av dei norske verftselskapa - og at dette var den direkte årsaka til at bankane sa opp avtalane sine. 

Han må difor personleg må bære ansvaret for tapa som er anslått i kravet. 

Alt om søksmålet - få oversikt her

Sterkt kritisk til buet sin strategi
Tomislav Debeljak og Tryg Forsikring sine advokatar er sterkt kritiske til konkursbuet sitt arbeid med søksmålet. I sitt sluttinnlegg vier dei motparten sin strategi eit eige punkt. 

Advokatane viser til at konsekvensane av ein fellande dom vil vere «katastrofale» for den kroatiske forretningsmannen. 

«Boet har tatt ut søksmål, og deretter anket over en grundig dom, i en sak som gjelder et potensielt ruinerende krav mot Tomislav Debeljak, uten først å ha gjort de grundige forberedelser og vurderinger som et konkursbo bør gjøre før slike krav bringes inn for domstolene». 

Forsvarar skyhøg advokatrekning
Advokatane skriv at buet sin «lettvinte og uforsvarlig minimalistiske tilnærming til saksforberedelsen har tvunget Debeljak og Tryg til selv å ta ansvar for å opplyse sakens faktiske og rettslige sider». 

Dei meiner difor det var feil av tingretten å kutte kraftig i advokatrekninga dei la på bordet etter førre rettsrunde. 

Bustyret sin advokat i tingretten, Jan Vablum, omtala kravet på nær 15 millionar som «hinsides» - og retten kom til at dei måtte nøye seg med kring 9,4 millionar. 

I sluttinnlegget til ankesaka skriv Debeljak sine advokatar at det var naturleg at deira utgifter var betydeleg høgare enn buet, og at dei bør få dekka alle sakskostnader.

– Skuldingane er grunnlause
Nett No har spurt bustyrar Bjørn Åge Hamre om hans kommentar til motpartens kritikk. Advokaten gir klart uttrykk for at han er provosert – men er kort i sin kommentar. 

– Skuldingane er grunnlause og elles har vi ingen kommentar til saka no, seier han til Nett No.

Etter tingretten si frifinning fortalde Hamre at han var overraska over utfallet – og at retten meinte bankane hadde skuld i konkursane. 

Alt om søksmålet - få oversikt her

Kritisk til rapport frå burevisor
Debeljak og Tryg sine advokatar påpeiker vidare at buet baserer seg på ein rapport frå burevisor, men at dei enno ikkje har lagt fram grunnlaget for denne. 

Dei viser også til at Debeljak og hans kollegaer i det kroatiske Div Group-konsernet, ikkje fekk tilstrekkeleg høve til å bidra til rapporten, eller å kommentere den.

Det same var tema i tingretten i november 2023. Då kom det óg fram at bustyrar Bjørn Åge Hamre hadde eitt møte med den tidlegare verftseigaren. Det skjedde på Teams og varte kring ein halvtime, fekk retten opplyst. 

Avgjerande skjebnemøte sentralt
Advokatane skriv vidare at buet ignorerte bevis som deira side la fram i tingretten, og ikkje viste interesse for dei forholda Debeljak framheva om eit omstridd skjebnemøte den 23. juni 2020. 

Det gjer at deira side ikkje kan stole på at buet vil erkjenne svakheiter ved sitt eige bevisgrunnlag – og underbyggjer behovet for å gjere eigne undersøkingar, skriv dei vidare i sluttinnlegget. 

Dei saksøkte konkluderer med å krevje full frifinning for både Debeljak og forsikringsselskapet.

NETT NO gjer merksam på at Green Yard Kleven ikkje har noko med søksmålet å gjere, som omhandlar det tidlegare verftsselskapet på Kleven.