Fann den rette løysinga i Ulsteinvik

- I første omgang skal vi lage ein demotank, men vi ser for oss at det kan verte mykje meir.

- Dette er ei løysing som passar perfekt inn for å gjere skipsfarta grønare.

Det seier utviklingsdirektør Tore Roppen i Ulsteinvik-selskapet Prodtex.

Selskapet har spesialisert seg på robotproduksjon av stål- og aluminiumskonstruksjonar. Tysdag signerte selskapet ein ny kontrakt, denne gongen ei utviklingskontrakt med det Trondheim-baserte selskapet IC Technology (ICT), eit selskap som har spesialisert seg på å utvikle tanksystem for transport av LNG og flytande hydrogen.

- Nøkkelen er robotsveising
Adm. dir. Leiv Låte i ICT seier at selskapet har leitt etter ein partnar til å produsere dei modulbaserte og skrogtilpassa tankane.

- Vi har leitt både i Sverige og fleire stader i Norge, og fann til slutt løysinga her i Ulsteinvik.

For selskapet har det vore viktig å finne ein aktør som kan byggje både lette og sterke tankar, og i tillegg gjere det kostnadseffektivt.

- Dette er Prodtex. Nøkkelen er robotsveising, seier Låte.

300.000 fartøy
Han stilte på avtalesignering saman med teknisk sjef Thomas Sperle, begge med lang erfaring frå oljeindustrien.

No er det grøn energi det vert satsa på. Selskapet er i oppbyggingsfasen, har ti tilsette, og har nyleg fått støtte for eit utviklingsprosjekt på totalt 27 millionar kroner.

- Det er 300.000 fartøy vårt konsept passar for. Dette kan verte verkeleg stort, seier Låte.

Saga Pure er med
På plass var også Jørgen Kopperstad, VP Maritime Opportunities i det børsnoterte selskapet Saga Pure.

Saga Pure, med Spetalen på eigarsida, har nyleg kjøpt seg inn med 30 prosent i IC Technology.

Kopperstad seier at han har stor tru på konseptet.

- Alle med skip og båtar vil over til grøn energi, men få veit kva det er rett å satse på.

- Systema til ICT kan brukast på rein flytande hydrogen, eventuelt LNG. Flytande hydrogen kan også brukast som innblandingskomponent i andre typar drifstoff. Her får ein ei løysing der ein kan nytte LNG, men der dei same tankane seinare kan nyttast til flytande hydrogen når tida er klar for det.

- Unik fleksibilitet
Han seier at det også er viktig at modulsystemet kan integrerast i skroget.

- Det er plasseffektivt, og det er lett å byggje ut systemet om det er behov for det.

Han ser for seg at dette kan verte ei god løysing frå alt frå store containerskip til mindre fiskefartøy.

- Tankane gir unik fleksibilitet ettersom ein kan lagre LNG og hydrogen i ein og same tank.

Tynne ståplater
Tore Roppen seier at tankane vert bygde med ein millimeter tjukke stålplater, og som to lag ‘sandwichar’.

Dermed vert tankane lette, sjølv om dei er bygde i rustfritt stål.

Dei flytande gassane skal kjølast ned til minus 253 grader Celcius, og halde den temperaturen.

Leiv Låte i ICT seier at det for selskapet er det viktig at sjølve produksjonen også er så grøn som muleg.

Produksjon i Vanylven
Tore Roppen kan kvittere ut det.

- Vi brukar kun rein energi frå vasskraft, og vi brukar lite energi ved å bruke robotsveising. I tillegg vil vi ha kortreist stål frå Sverige eller Finland, der også malmen til stålproduksjon er lokal.

Han har lova at demotanken skal vere ferdig til sommaren. Arbeidet skal skje ved Prodtex sitt anlegg på Fiskåholmen i Vanylven.

- Her har vi kapasitet til å byggje mange tankar, i ulike størrelsar.

- Vi kan for den saks skuld også byggje eit komplett maskinrom med tankar for dei som vil ha ei slik løysing, seier Roppen.

Vurderer etablering på Sunnmøre
Om det er slik at ICT til slutt vil byggje sin eigen fabrikk, vil han gjerne også vere på den prosessen.

- Vi har sagt at vi kan byggje den fabrikken.

Leiv Låte seier at det kan vere aktuelt å utvide samarbeidet med Prodtex.

- Ja, det er også mogleg at vi vel å etablere oss her i regionen.

- Vi er imponert over den skaparkrafta som er rundt den maritime klynga her.