Prodtex-sveisen betre enn venta

Prodtex har i fleire år jobba med å utvikle sin eigen sveisemetode som no er under omfattande testing i regi av DNV og Sintef.

Håpet har vore at den nye metoden kan vere med å spare store summar i framtidige vegprosjekt. So langt er resultata betre enn venta.

– Vi har gjort ein del utmattingstestar, som ofte kan vere ei utfordring når det gjeld bruk av stål. Så langt viser resultata at metoden overpresterer ut frå kva vi hadde venta at dei nye sveisane skulle tole. Det er eit godt teikn, fortel sjefsingeniør Johannes Veie i Statens vegvesen til NETT NO.

Prodtex har hatt fleire utviklingskontrakter med vegvesenet om levering av mindre bruer dei siste åra. Dei første er levert, og det er på desse at utvalde delar av konstruksjonen er testa.

Tromsø-bru kan bli «syretest»
Sjefsingeniør Veie fortel at det står att ein del arbeid før dei kan seie noko om kor mykje det kan vere mogleg å spare i kroner og øre.

– Ved desse testane skal vi vise at den nye metoden iallfall ikkje er dårlegare enn dagens. Vidare vil vi forsøke finne ut kva som ligg av gevinstar ved at vi kan nytte mindre dimensjonar, eller ha raskare produksjonstid, seier han.

Raskare produksjon kan det bli mogleg å prøve ut på eit større prosjekt allereie neste år. Vegvesenet skal bygge den nær 900 meter lange Ramfjordbrua i Tromsø, og her er det framleis aktuelt å bruke robotsveis frå Prodtex.

– Det kan bli en syretest for denne metoden, stadfestar Veie.

Kan spare milliardar
Vegvesenet kan velje mellom å utvikle nye standardar for den nye metoden, eller gjere eit testprogram for kvart enkelt prosjekt, som ein brukar resultata frå. Det første vil krevje meir ressursar, men kan likevel vere aktuelt.

Om metoden blir nytta på nokre av dei planlagde storprosjekta langs ferjefri E39, kan det vere snakk om innsparingar i milliardklassa.

– Ved den planlagde brua på E39 over Bjørnafjorden er det til eksempel planar om å nytte om lag 100.000 tonn stål. Då kan ei innsparing akkumulere seg til store summar, seier Veie.

- Sett stor pris på arbeidet
Forretningsutviklar Tore Roppen i Prodtex har naturleg nok vore orientert om testresultata undervegs.

– Dei testresultata som Statens vegvesen gjer no, er den beste reklamen du kan tenke deg, svarar han på spørsmål om kva han synest om tilbakemeldingane.

– Vi sett stor pris på arbeidet som blir lagt ned for å dokumentere kvaliteten på den type produksjon vi held på med, legg han til.

Tidlegare testar i Sverige har vist dei same tendensane, ifølgje Roppen.

Aktuelt til vindkraft og havbruk
Forretningsutviklaren fortel at selskapet har fått vidare kontrakt med vegvesenet om å lage fleire bitar som skal bli testa vidare i eit eige løp.

Han påpeiker at utmattingstestane kan vere verdifulle for selskapet i andre marknader.

– Desse eigenskapane kan telle positivt på fleire områder, ikkje berre bruer, som også andre konstruksjonar som er utsett for utmatting innan til eksempel vindkraft og havbruk, seier Roppen.