– Uroa for sterkt aukande kostnader

Dei to transportselskapa Tenden i Stryn og Veøy i Åndalsnes er mellom dei som er bekymra for auka drivstoffkostnader.

- Med utviklinga på drivstoffprisane dei siste vekene er vi svært uroa for sterkt aukande kostnader til sluttbrukar og på om vi klarer å halde drifta i gang, uttaler eigarane Rolv Olav Tenden og Lars Elling Bjåstad i ei pressemelding frå Mafoss (Maritim Forening for søre Sunnmøre).

No ber dei styresmaktene stille opp økonomisk for å hjelpe dei å takle situasjonen.

Dialog med kundane
Transportselskapa har hatt dialog med dei største kundane sine, som til no har hatt forståing for prisauken. Dei er uroa for korleis situasjonen blir om prisane held fram med å stige.

Dagleg leiar Jan Thormodsæter i Mafoss fortel at fleire av deira medlemmar får ei rask kostnadsauke. Han er bekymra for ein maritim bransje som alt har vesentlege etterslep på inntekter å handtere etter ein langvarig pandemi.

Sp-leiarar vil ha krisehjelp
Regjeringa er i desse dagar samla til budsjettkonferanse der dei arbeider med statsbudsjettet for neste år. Med seg i fanget har regjeringa fått den nye situasjonen krigen i Ukraina har skapt, med høge drivstoffprisar.

Fleire fylkeslagsleiarar i Senterpartiet har oppmoda regjeringa og finansminister Trygve Slagsvold Vedum (Sp) om å hjelpe bilistane med dei skyhøge drivstoffprisane.

Sverige legg fram milliardpakke
Måndag kom nyheita om at den svenske regjeringa legg fram ein støttepakke til det svenske folket for å bøte på dei høge drivstoffprisane.

Den svenske pakken har ei totalramme på 14 milliardar svenske kroner og skal mellom anna gå til å redusere drivstoffavgifta og auke bustøtta for barnefamiliar. I tillegg foreslår den svenske regjeringa å innføre eit eingongstilskot på 1.000 svenske kroner til alle privatpersonar som eig ein bil.

Skyhøg råoljepris
Prisen på råolje var allereie høgare enn på mange år før den russiske invasjonen av Ukraina. Russland er ein stor oljeprodusent, og konflikten har pressa prisane endå høgare.

Nyleg var prisen oppe i 140 dollar fatet – det høgaste på 14 år sidan – i enkelte marknader, etter at USA snakka med forbundsfellane sine om å forby import av russisk olje. Russlands visestatsminister Aleksander Novak har åtvara og sagt at eit importforbod kan føre til svimlande oljeprisar på over 300 dollar fatet.