![Skansekaia montasje helge gjerde foto marius 11](/imager/images/515261/skansekaia-montasje-helge-gjerde-foto-marius-11_859d8f71e51cdcc79197ecd3648d156c.webp)
Vil ha tempo og klarheit i eksportsatsing
Regiondirektøren er overtydd om at auken frå 15 til 25 Innovasjon Norge-tilsette i Ålesund, vil vere bra. Men per no veit han lite om korleis det skal skje.
Førre veke blei det klart at regjeringa avviklar det planlagde Eksportstrategirådet – og i staden vil auke staben ved Innovasjon Norge sitt kontor med ti nye tilsette.
Kontoret som blir leia av regiondirektør Helge Gjerde, teller i dag 15 medarbeidarar, så det er openbart at satsinga vil merkast.
– Når det er slik at beslutninga til den førre regjeringa ikkje lengre står ved lag, er vi glade for at regjeringa samtidig indikerer ei tydeleg auke i eksportsatsinga i Norge – og for at det skal byggast opp eit større miljø her i Ålesund, fortel Gjerde til NETT NO.
Innovasjon Norge har også kontor i Molde, og har kring 25 tilsette i heile Møre og Romsdal i dag.
Vil ha satsinga på plass raskt
Førebels veit regiondirektøren lite om korleis styrkinga skal skje.
– Vi er i dialog med departementet, men per dato veit vi ikkje meir enn det som har stått i media om korleis dette skal gjerast, fortel han.
– Eg reknar med at det ikkje er situasjonen lenge. Vi ønsker tempo og klarheit i dette så fort som mogleg, legg Gjerde til.
Parallell prosess med kostnadskutt
Samtidig som Innovasjon Norge får ei endå meir framtredande rolle i eksportarbeidet, pågår eit arbeid med å redusere kostnader ved alle kontora.
Planen om å redusere drifta med 100 millionar og redusere med 75 årsverk over dei neste tre år, kan også få følgjer for bemannninga her i fylket.
– Vi er i ein ganske omfattande prosses med å levere på det kravet, men korleis det vil påverke kontora i Ålesund og Molde veit vi ikkje enno, seier Gjerde.
Regiondirektøren legg til at kuttprosessen truleg vil vere sluttført «innan relativt kort tid», men at han ikkje veit konkret.
(saka held fram under)
![Helge Gjerde foto marius 11](/imager/images/249605/Det-handlar-ikkje-om-at-vi-skal-finne-den-nye-olja_452393f9122041e91205caa465b1472b.webp)
Ekstra Eksfin-stilling
Når det gjeld den varsla oppbemanninga ga næringsministeren i førre veke
uttrykk for at regjeringa har hastverk med å få eksportsatsinga på
plass. Statsråden lova samtidig at det skulle byggjast eit «kraftig
eksportorientert miljø» i Ålesund.
I tillegg til å auke staben til Innovasjon Norge, vil Eksfin få ein person ekstra ved deira kontor i byen. Her har Stig Gjethammer til no vore den einaste i den statlege etaten med kontor utanfor Oslo.
Næringsministeren opplyste at Eksfin-stillinga ville komme «relativt raskt» og at dei ti stillingane til Innovasjon Norge vil kome over «noe tid».
Overtydd om at grepet vil tene næringslivet
Regiondirektøren påpeiker at han først og fremst er oppteken av at
verkemiddelapparatet skal tene næringslivet. Han er overtydd om at
bedriftene vil merke grepet med ei opptrapping i Ålesund.
– Det trur eg vi skal klare, og eg meiner det er fornuftig bruk av fellesskapet sine pengar at Innovasjon Norge tek ein større del av oppdraget med å auke eksporten, fortel han.
Marknadsstøtte og merkevareordning
Regjeringa leverer samtidig på to andre områder som mellom anna har vore ønska frå møbelindustrien her i regionen.
– Innovasjon Norge har fått i oppdrag å utarbeide ei nasjonal merkevareordning. No kan bedriftene også få støtte til marknadsaktivitetar som å reise til messer, og liknande. Det er ordningar som ein del andre land har hatt ei stund, og som Innovasjon Norge no har fått ansvaret for, fortel Gjerde.
Publisert: 17.03.2022 10:43
Sist oppdatert: 17.03.2022 20:54