Aurstad-leiinga i vitneboksen

Tysdag 20. april skal både grunnleggar av Aurstadkonsernet, Kjell Arne Aurstad, og dagleg leiar Jo Stian Tverberg forklare seg for Søre Sunnmøre Tingrett i rettsaka mot Cato Aurstad. Kjell Arne Aurstad var også styreleiar K.A. Aurstad.

Også økonomisjef Petter Espe og styremedlem Oddvin Breiteig skal i vitneboksen.

Cato Aurstad er største eigar og driftsleiar i Aurstad-konsernet, ei rolle han også hadde i datterselskapet K.A. Aurstad, som gjekk konkurs 6. desemberr 2018.

Då hadde selskapet over 200 tilsette, og var hovudselskapet i konsernet.

Sal til underpris
To månader for konkursen selde K.A.Aurstad maskinparken til søsterselskapet Aurstad Maskinutleige til 20 millionar kroner. Det var eit sal langt under marknadspris, og var ein transaksjon som gjekk ut over kreditorane, meiner Økokrim.

Økokrim tok ut tiltale mot Cato Aurstad januar i år.

Første veke i retten
Denne første veka i retten har gått med til aktor og forsvaret sine innleiingar, forklaringa og utspørringa av Cato Aurstad.

Dessutan har mellom andre dagleg leiar Petter Bjarøy i Bjarøy as, bustyrar, burevisor og representantar for DNB og Sparebank1 Søre Sunnmøre forklart seg. Bjarøy as gjorde ei verdivurdering av maskinparken på oppdrag frå DNB før konkursen, og sto for salet av omlag tre fjerdepartar av maskinparken etterpå.

I dag har representantar for selskap som kvar for seg leverte verdivurderingar av ulike deler av maskinparken til K.A. Aurstad før konkursen forklart seg.

Ulike vurderingar
Petter Bjarøy sa i si forklaring at prisen på maskinparken som var sett frå K.A. Aurstad si side "heng ikkje på greip".

Bustyrar Håvard Wiker tok beslag i maskinparken etter at det var opna konkurs og grunngav det med Aurstad Maskinutleige ikkje hadde oppnådd rettsvern for transaksjonen. Om Aurstad Maskinutleige hadde hatt rettsvern, ville det blitt eit omstøytingsak, sa han i si forklaring,

Burevisor Per Ødegaard sto i si forklaring fast på at insolvenstidsspunktet for K.A. Aurstad var i juni 2018, sjølv om han sa vurderinga hans kunne vere farga av at selskapet faktisk gjekk konkurs.

Insolvenstidspunktet er når selskapet ikkje er betalingsdyktig og har reell negativ eigenkapital.

Ifølgje Cato Aurstad var poenget med salet å kunne finansiere vidare drift av K.A. Aurstad og berge selskapet. Transaksjonen var basert på forretningsmessige vurderingar, basert på råd frå utanforståande og alt blei gjort ope for alle. K.A. Aurstad hadde positiv eigenkapital ved konkurstidspunktet, ifølgje forklaringa.

- Eg kjenner meg ikkje att i tiltalen. Viss eg har vore i tvil så har eg søkt råd. Eg trur du finn ingen byggherrar som seier at eg har prøvd å lure dei, sa Cato Aurstad i si forklaring.

Det er korkje snakk om at K.A. Aurstad var insolvent lenge før konkurstidspunktet eller at salet av maskinparken vart gjort til underpris, sa forsvarar Vegard Aaløkken i sitt innlegg.