Henta investorane på heimebane

Ideen til Parkly er å bruke kamerateknologi og kunstig intelligens for å registrere og ta betalt for parkering. Målet i første omgang er å vinne innpass hos kundar som dei store etablerte konkurrentane hittil har funne for små.

Teknologiselskapet i Sula har i dag 23 kundar og hadde omlag 10 millionar kroner i driftsinntekter i 2021. Selskapet blei etablert i 2019, og hadde under ein million kroner i driftsinntekter i 2020.

Nye kundar er på veg inn og i år ligg selskapet an til mellom 30 og 40 millionar kroner i driftsinntekter, ifølgje dagleg leiar og medeigar Ola Engvik.

Selskapet har fem tilsette i Ålesund. Engvik sjølv vekependlar til Oslo for å arbeide inn mot marknaden på Austlandet. I tillegg har selskapet eit samarbeid med eit selskap med fem utviklarar i Sri Lanka.

Pir-selskap på eigarsida
Før kapitalutviding som blei gjennomført våren 2021 var Egil og Hans Joakim Giørtz største aksjonærar i Parkly gjennom selskapet HIG Invest. Dei er største eigar også etter kapitalutvidinga.

I tillegg til far og son Giørtz og OIa Engvik, var også Erik Haug Herje, Avento-medgrunnleggar Stian Bang og Steffen Djupvik Brandtzæg medeigarar.

I kapitalutvidinga gjekk Pir V Invest, eit selskap i Pir-nettverket, inn med omlag halvparten av dei 14 millionane Parkly henta inn. Det gav Pir V Invest omlag 10 prosent eigarskap.

Dei andre deltakarane i kapitalutvidinga var Kaj Bang Westre og Leif Arne Langøy- gjennom sine selskap - og Dag Honningsvåg og Olav Sindre Kriken, ifølgje Engvik.

I Pir Invest V er Asbjørn Solevågseide, Peder Stette og Frode Håkon Kjølås dei største eigarane.

Dei tre var partnarar i fiskeindustriutstyrs-selskapet Optimar, og har gjort fleire investeringar saman etter salet av Optimar. Med på eigarsida er også søskena Ingvild, Jan Endre og Sindre Vartdal - som eig Vartdal Plast - advokat Ole-Reinhart Notø, Tore Rødal og Erik Westre.

Valde lokalt
Poenget med kapitalutvidinga var å finansiere rask vekst. Selskapet vurderte fleire alternativ, også å få inn større investorar og meir pengar.

Då ville dei opphavlege eigarane bli kraftig utvatna, samstundes som tyngdepunktet i eigarskapet hadde blitt flytta vekk frå Nordvestlandet.

- Etter dialog med Anja (Anja Solevågseide, leder for Pir Invest og frontfigur i Pir-systemet, red merk) og den gruppen fann vi ut at det var fornuftig å ha sunnmørske investorar, sier Engvik.