Neste store satsinga kjem på Sunnmøre

- Det nye anlegget kjem på Sunnmøre, med god tilgang til elektrisk kraft og nær den maritime klynga. Tomta har vi alt sikra oss, seier dagleg leiar Jens Berge i Ålesund-baserte Norwegian Hydrogen.

Det siste prosjektet er eit resultat av eit Enova-støtta forprosjekt der Norwegian Hydrogen saman med Eviny (tidligere BKK), Tafjord Kraftproduksjon og Rauma Energi har samarbeida. Prosjektet har sett på ei rekke alternativ til plassering av ein hydrogen-hub for Vestlandet og Møre og Romsdal.

- Dette blir spesielt viktig for å få lett tilgang til hydrogen for den maritime næringa, seier Berge.

Hellesylt-satsinga går også framover. Her er planen at produksjonsanlegget skal stå klart i løpet av neste år.

- Dette er meir eit lokalt prosjekt med fokus på å levere grønt hydrogen til kundar i og rundt Geirangerfjorden, seier Berge.

Han opplyser at både varmen og oksygenet frå produksjonen skal brukast.

- Det nye Flakk-hotellet ‘Basecamp Hellesylt’ skal ha varmen, og lokale oppdrettarar skal ha oksygenet.

- Her vert det også fyllestasjon for både bilar og båtar.

Satsar også i nord
Norwegian Hydrogen er også i samtalar med Troms og Finnmark fylkeskommune om utbygging av infrastruktur for båt- og vegtransport i regionen.

- I tillegg er det på gang ei satsing saman med Narvik Hydrogen å byggje ut produksjons- og distribusjonsanlegg, som også kan levere til dei store industriprosjekta i Nord Sverige, seier Berge.

Mange med spørsmål
Selskapet deltok på Nor-Shipping2022 på Lillestrøm. Marknadssjef Marielle Furnes Mannseth seier at det var vellukka.

- Vi har vore godt synlege, og vi har knytt mange nye kontakter.

Ho fortel om fiskebåtreiarar og andre aktørar som har hatt mange spørsmål rundt både produksjon, distribusjon og lagring.

- Vi er nok den einaste produsenten av hydrogen på messa, men her er mange aktørar i resten av verdikjeda.

- Vi har også knytta fleire internasjonale kontakter. Interessa er stor.

- Ikkje einaste løysinga
Ho seier at det er stort fokus på hydrogen på messa, spesielt på grønt hydrogen, der hydrogenet vert produsert ved hjelp av fornybar energi.

- Vi seier ikkje at hydrogen er den einaste løysinga. Vi seier at hydrogen, saman med andre grøne løysingar, er viktig for å få ned utsleppa og nå klimamåla.

- Der det ikkje er mogleg å elektrifisere direkte eller å bruke batteri, vil grønt hydrogen være ei veldig god løysing med null utslepp.