Prodtex-gründerne vil starte på nytt

Gründerane bak Prodtex ønsker ikkje å gi seg, og vurderer å starte opp verksemda på nytt.

Det stadfestar duoen Sigbjørn Nordstrand og Tore Roppen, som var høvesvis dagleg leiar og forretningsutviklar i det konkursråka selskapet. 

– Vi ønsker å starte opp på nytt, og dei tilsette har sagt at dei vil vere med, seier Nordstrand til Nett No. 

Gründerane starta opp Prodtex i 2017, og vekte stor merksemd med sin avanserte metode for lasersveising. Den gjorde det mellom anna mogleg å bygge bruer med langt lågare klimaavtrykk, enn ved tradisjonelle metodar. 

Nordstrand og Roppen påpeiker at det er alt for tidleg å seie kva form ein ny oppstart vil få, men dei er ikkje avhengige av å sikre seg til eksempel teknologi frå konkursbuet. 

– Det er folka som utgjer teknologien vår, seier Roppen. 

Satsa på fleire område
Prodtex Industri som gjekk konkurs i fjor, var produksjonsselskapet og haldt til på Fiskåholmen i Vanylven. I tillegg til å lage fleire mindre bruer for Statens vegvesen, satsa selskapet på fleire område. 

Dei sikra seg mellom anna oppdrag med å lage store tankar for frakt av hydrogen på skip og stålmerdar til oppdrett som Lerøy Seafood skulle ta i bruk. 

Utfordringar med sistnemnte oppdrag var den utløysande årsaka til fjorårets konkurs. 

Sidan har morselskapet kjempa for å halde seg flytande. Blant annet skulle dei få hjelp frå Ulmatec-konsernet med å lage køyretøysperrar til Statsbygg. 

Oppdraget enda som kjent med at den statlege bedrifta retta eit krav mot Prodtex – som utløyste den siste konkursen. 

Ikkje aktuelt for buet å vidareføre drifta
Ingeniørverksemda til Prodtex AS som melde oppbod tysdag, var framleis i gong på konkurstidspunktet. Bustyrar Øystein Remme opplyser til Nett No at det ikkje er aktuelt for buet å ta over. 

– Det blir ikkje vidareført drift i buets regi, og alle tilsette vil få oppseiing, opplyser han. 

Bustyraren var onsdag i møte med den tidlegare leiinga om konkursen. Då fekk han også opplyst at det blei vurdert ein ny oppstart. 

Pantet truleg høgare enn verdiane
Bustyraren opplyser at verdiane består av uteståande fordringar, bankinnskot og ein del lausøyre. 

– Alt av verdiar som er avdekka så langt, kjem under bankens pant, fortel han. 

Bustyraren reknar difor med at det blir opp til banken å ta ansvar for å realisere desse. Remme påpeiker samtidig at buarbeidet er tidleg i prosessen, og at dette er førebelse vurderingar. 

Den samla verdien i selskapet vart i tingretten anslått til kring 7,8 millionar. Gjelda er på 18,9 millionar kroner, som også inkluderer eit betydeleg lån frå aksjonærane.