Forhandlar om verdiane etter Prodtex-konkursen

Etter konkursen i Prodtex Industri i Vanylven er det jobba med å realisere verdiar og søke aktørar som kan være interessert i eigedomen på Fiskåholmen.

Det konkursråka selskapet eigde industriområdet med industrihallen og tilhøyrande utstyr.

Dette gjekk i utgangspunktet inn i buet, men var pantsett til ein høgare sum enn verdiane, og er overlate til panthavarane med Sparebank 1 SMN i spissen.

No er fleire aktørar i dialog med kreditorane om ulike løysingar.

– Det er interessentar både for eigedomen, varelager og driftsmidlar, fortel bankens advokat, Roy Henning Haddal, til Nett No.

Er pågåande forhandlingar
Advokaten ønsker ikkje å kommentere saka vidare, og viser til Bjarøy As, som har oppdraget med å hjelpe til å realisere verdiane.

Selskapet har spesialisert seg på å handtere konkursbu og har no også dialogen med aktørane. Bjørnar Giske i selskapet stadfestar opplysningane frå banken.

Han opplyser til Nett No at det går føre seg forhandlingar, men grunna teieplikt kan han ikkje kommentere desse.

Sveiserobotar og nesten ferdig oppdrettsmerd
I tillegg til sjølve eigedomen, består verdiane av maskinar og utstyr, mellom anna sveiserobotar og spesialutstyr til sveising, ifølgje den første rapporten frå bustyrar Espen Rekkedal i saka.

I varelageret inngår også ein nesten ferdig oppdrettsmerd i stål med ein omkrins på 160 meter. Selskapet var ferdige med den første av fem slike merdar som var bestilt av Lerøy Seafood.

Selskapet jobba også med å bygge ein gasstank for hydrogen. Verdiane inkluderer vidare store mengder stål og ein del spesialmåling.

Alt om Prodtex-satsinga

Oppdrag i ny marknad velta drifta
Oppdraget med å bygge oppdrettsmerdane var ein ny marknad for Prodtex-selskapet, og vart den direkte årsaka til konkursen.

Bustyrar har fått opplyst at arbeidet med stålmerdane medførte ein del prøving og feiling. Samtidig hadde dei forseinkingar på levering av utstyr og materiell.

Det blei forsøkt innleige av ekstra personell for å auke produksjonstempoet, som førte til nye vanskar for produksjonen.

Klarte ikkje tilføre nok pengar
Betalinga for arbeidet blei utløyst ved ferdigstilling av merdar. Undervegs hadde selskapet ein rekke leverandørar som ikkje fekk betaling, og dei klarte ikkje tilføre nok pengar til å sluttføre merd nummer to, ifølgje rapporten frå bustyrar.

Selskapet opplyste ved konkursen at dei hadde forsøkt å komme til ein avtale med både kunde, bank og andre kreditorar, utan å lukkast.

Då hadde leiinga ikkje anna val enn å melde oppbod.

Etter konkursen utelukka ikkje den tidlegare leiinga at dei ville forsøke å starte opp att tilsvarande verksemd. Dagleg leiar Sigbjørn Nordstranda ønsker ikkje å kommentere situasjonen no.

Hadde gjeld på 162 millionar
Prodtex Industri blei starta opp i 2019 som eit dotterselskap av Prodtex A i Ulstein. Det konkursråka selskapet dreiv produksjon, medan teknologien selskapet har utvikla, ligg i morselskapet.

Prodtex Industri hadde ei gjeld på 162 millionar og verdiar for 76 millionar kroner då konkursen var eit faktum.

Bustyrar peiker i sin rapport på at det er betydeleg underdekning, og at det neppe blir verdiar att til uprioriterte kreditorar.

Laga bruer og køyretøysperrer
Prodtex si etablering av ny industriverksemd på Fiskåholmen blei teke svært godt i mot i lokalsamfunnet. Då hadde industrihallen vore delvis tom i lengre tid.

Verksemda har laga fleire bruer for Statens vegvesen og køyretøysperrer som sikrar regjeringskvartalet i Oslo. Dei jobba også med å lage hydrogentankar til skip.