Vil flytte flest mogleg folk frå skip til land

Under konferansen Ship Technology Days i Ulsteinvik stod teknologi til sjøs på dagsorden onsdag. Nærare 100 deltakarar frå bransjen og ulike organisasjonar var samla til fagleg påfyll på Quality-hotellet.

Selskapet Ocean Infinity er mellom dei som ligg langt framme i den teknologiske utviklinga og fortalde korleis dei jobbar med å utvikle ein skipserie kalla Armada som på sikt skal operere autonomt.

– Vi er veldig for å ta dei mange små stega undervegs, men bygger skipa frå botnen slik at dei kan støtte den framtidige revolusjonen som vi ser føre oss, fortel Morten Skogvold.

Nordmannen har tittelen «lead marine autonomy technologist» og jobbar frå heimekontor i Ålesund. Selskapet har hovudkontor i Storbritannia, men er representert både i Sverige, USA og Asia.

Meir frå konferansen:

Vil bygge fleire skip
Ocean Infinity har allereie fått levert åtte skip frå Vard, og har seks skip til under bygging ved Vung Tau-verftet i Vietnam. Utrustninga skjer delvis i Norge.

Fleirbruksskipa kan mellom anna ta på seg oppdrag for havvindoperatørar, eller andre som vil gjere ulike undersøkingar til havs.

Skogvold kan ikkje seie stort om utsiktene til at Vard får oppdrag med å bygge fleire slike skip. Samtidig kan det ligge i korta at verftskonsernet truleg stiller sterkt i konkurransen om tilsvarande nye oppdrag, gitt erfaringa dei har med å bygge dei første fartøya.

– Vi har ambisjonar om å bygge fleire skip. Om det blir av samme type, eller større eller mindre, veit vi ikkje no, seier han.

Har bygd kontrollsenter på land
I første rekke skal Ocean Infinity få levert skipa dei har under bygging – og deretter skal dei utforske moglegheitene med teknologien til å «endre operasjonar til sjøs», som det heiter i visjonen til selskapet.

– Vi har eit klart mål om at vi må gjennomført ei flytting av folk frå skip til land, seier Skogvold om arbeidet som skal gjerast.

Fleirbruksskipa blir omtala som «marine robotic»-fartøy og er mellom anna tilrettelagt for fjernstyring frå land. Difor har selskapet bygd kontrollsentera på land – førebels i Sverige, Storbritannia og Australia.

– Kanskje den viktigaste grunnen er at vi har valt å gå denne vegen, er at vi har mange ROV-operatørar om bord, der mykje kan bli vunne ved å flytte dei over på land, seier han.

Kan spare tid og utgifter
Til vanleg ville tilsvarande skip som Ocean Infinity har fått levert frå Vard, hatt opp mot 50 sengeplassar til ulike operatørar som må vere med ut til havs for å gjere jobben dei skal utføre.

– Om dei kan jobbe frå eit kontrollsenter på land, kan dei spare mykje tid og gjere færre flyreiser rundt om kring i verda for å støtte skipa, seier han.

Å flytte operatørane på land gjer at dei til eksempel kan jobbe frå kontrollsenteret medan veret er ok, og konsentrere seg om anna arbeid ved røffare ver. Skogvold seier at dei ikkje ser vekk frå at det kan auke kostnadane på kort sikt, men er overtydd om at det vil lønne seg på sikt.

– Vi trur at vi ei periode kjem til å ha nokre ekstra folk på kontrollsentera, for at dei skal lære seg å bruke systema og blir trygge på bruken av dei, seier han.

Trinnvis utvikling
No skal dei tre første Ocean Infinity-skipa ta det første steget inn i eit program med siktemål om ei fjernstyrt flåte. I første omgang vil teknologien vere ei støtte for mannskapet som står for oppgåver med navigasjon og maskinvedlikehald om bord.

Gjennom ei trinnvis utvikling ser reiarlaget føre seg å gradvis gå over til fjernstyrt drift frå land - og skip meir eller mindre utan mannskap om bord.

– Vi er veldig for å ta dei mange små stega undervegs, men bygger skipa frå botnen slik at dei kan støtte den framtidige revolusjonen som vi ser føre oss, fortel Morten Skogvold.

Trur mange skip framleis vil ha mannskap
Med andre ord er det langt fram til at skipa seglar heilt utan folk om bord – og Skogvold påpeiker at det truleg ikkje blir ein realitet på dei største skipa. Her reknar han med at det framleis vil vere mannskap, men at dei kanskje vil ha andre oppgåver – til eksempel vedlikehald av utstyr.

– Det er ikkje noko tvil om at når det gjeld mange av operasjonane vi gjer, så vil ein framleis trenge nokre folk om bord - men færre, understrekar Skogvold.

Dei mindre farkostane i Armada-flåten på 21 og 36 meter skal etter planen segle utan personar om bord. Kongsberg Maritime er blant dem som har levert teknologi til Ocean Infinity-skipene.