– Har ikkje kome opp eit alternativ

Då Nett No møtte Støre i 2022 og spurte om auken i formuesskatten, sa statsministeren at han var trygg på at folk sine formuar blei skatta på ein måte han meinte var «fullt ut forsvarleg».

Sidan har kritikken mot regjeringa sine skattegrep for næringslivet berre auka i styrke.

– Har du framleis same oppfatning av korleis formuesskatten treffer norske bedriftseigarar?

– Formuesskatten er ein viktig inntektskjelde for fellesskapet vårt, som mellom anna gjer det mogleg å gi støtte til anlegg som dette, svara Støre då han besøkte Hellesylt for å opne den nye hydrogenfabrikken førre veke.

Støre viser til at skatten også er ein viktig måte å fordele rikdom her til lands, som bidreg til mindre skilnader mellom folk.

– Ingen skatt er utan ulemper, og eg meiner at alternativet med å fjerne den, slik nokre parti vil, er eit dårleg alternativ, held Støre fram.

– Har ikkje kome opp eit alternativ
Både tidlegare næringsminister Jan Christian Vestre (Ap) og tidlegare næringspolitisk talsperson Anniken Huitfeldt har i løpet av det siste året sagt at dei er villige til å «sjå på formuesskatten» i Arbeiderpartiets arbeidet med nytt partiprogram.

– Kva for alternativ kan du sjå for deg?

– Eg er alltid pragmatisk for korleis vi innrettar skattar. Det er ein diskusjon om det bør innrettast på ulike måtar, til eksempel med botnfrådrag. Men inntektene som dei med størst formue bidreg med til fellesskapet, meiner eg det er viktig at dei bidreg med.

– Eg er hovudet ikkje ideologisk bunden til at det må skje på den eine eller den andre måten, men det har ikkje kome opp eit alternativ som fullt ut tek i vare det vi ønsker.

Meiner auka selskapsskatt for alle er urettferdig
Å erstatte formuesskatten med ein høgare selskapsskatt for alle – som Høgre-leiar Erna Solberg har opna for – meiner Støre er urettferdig.

Skatteutvalet som blei leia Ragnar Torvik foreslo ei rekke endringar, mellom anna å vri meir av skattlegginga over på eigedom og bustader.

Støre ville ikkje ta seg tida til å svare på spørsmål om ei slik retning kan vere eit alternativ under den korte intervjurunden med pressa på Hellesylt.

Nett No har sendt spørsmål til statsministerens kontor om Støre ønsker å utdjupe i ettertid, men ikkje fått svar.

Flakk møtte Støre om formuesskatten
Rapporten frå skatteutvalet leia av Torvik - som finansminister Trygve Slagsvold Vedum er blitt skulda for å ha putta i ein skuff – foreslo redusert formuesskatt, som delvis skulle bli erstatta med ein skatt på arv.

Samtidig føreslo utvalet ein reduksjon i skatt på alle lønns-, trygde- og næringsinntekter. det skulle komme spesielt låglønte til gode.

Knut Flakk er som kjent ein motstandar av formuesskatten, og har starta Aksjon for Norsk Eierskap saman med Roger Hofseth.

Under Støre sitt besøk på Hellesylt, fekk han tid til å ta ein prat med statsministeren om temaet, utan at han opplevde å få større forståing for sitt syn enn tidlegare.

– Men eg opplever at han er i tenkeboksen, seier Flakk.

Vil bytte inn formuesskatten
Flakk har tidlegare lagt fram sitt forslag til løysing som går ut på å «bytte» vekk formuesskatten med å skattlegge formueobjekt som dyre hytter, hus, bilar og båtar.

– Eigedomsskatten er basert på bruttoverdien og du får ikkje frådrag for gjeld, seier Knut Flakk til Nett No:

– Det kan også vere på bil, båt, hus og heile den luksusdelen av folk sine verdiar. Då er det ingen som slepp unna av dei som er velståande. Også må det vere eit innslagspunkt som er ganske høgt, slik at det ikkje råkar folk med vanlege bustader, legg han til.

Ved til eksempel å skattlegge alle verdiar over 15-20 millionar, meiner Flakk at ein samtidig sikrar seg mot at folk med store verdiar blir nullskatteytarar.