Røkke vil vente med gruvedrift på havbotn

Før helga gjekk fristen ut for å seie si meining om opning av områder for utvinning av mineral på havbotnen.

Forslaget frå regjeringa har vekka heftig debatt og det er kome inn fleire enn 1000 høyringssvar.

Fiskeri og miljørøsla er kritiske
Ein rekke miljøorganisasjonar er kritiske til forslaget, saman med Havforskingsinstituttet.

Det same er fiskeriorganisasjonar som Fiskebåt. Dei fryktar konsekvensane for pelagisk fiske i område, og skadeleg påverknad for mellom anna for fiskebestand og økosystem.

Organisasjonen som representerer dei største eigarane i fiskeflåten, viser til at alle miljøfaglege institusjonar peiker på mangelfull kunnskap. Fiskebåt sin konklusjon er at det er for tidleg å opne for slik verksemd.

Rev Ocean peiker på sårbar fauna
Kjell Inge Røkke-selskapet Rev Ocean er mellom dei som er kritiske til forslaget. Dei skriv i sitt høyringssvar at dei er «ekstremt bekymra» for planane om å opne for mineralverksemd i eit område som i stor grad ikkje er undersøkt.

Rev Ocean viser til at dei undersøkingane som er gjort, viser ein svært sårbar fauna kring felt med varme kjelder – omtala som «skorsteinar».

Selskapet meiner difor det er for tidleg å opne for leiting og gruvedrift – utan grundigare undersøkingar av havområda.

Fiskeridirektoratet seier ikkje nei
Fiskeridirektoratet har derimot ikkje alvorlege innvendingar mot forslaget, og viser til at mineral frå havbotnen kan bli ei framtidig næring.

Direktoratet skriv i sitt høyringssvar at det er lite norsk fiskeriaktivitet i områda som er føreslått opna. Samtidig påpeiker det er viktig med tidleg informasjon til fiskeriinteressene i forkant av eventuelle aktivitetar.

Norges Rederiforbund er blant dei som stiller seg positive, og trur Norge er godt posisjonert for å utvikle ekspertise for forsvarleg utvinning av slike mineraler.

Stortingsmelding i vår
Regjeringa har planar om å legge fram ei stortingsmelding om mineralverksemd på havbotnen i løpet av våren.

Det er føreslått å opne eit større område mellom Svalbard og kysten av fastlandet, mellom anna ved Mohnsryggen, ein vulkansk midthavsrygg som skil to jordskorpeplater, i bassenget i Norskehavet.

Regjeringa meiner det er viktig å opne for kommersiell leiting og kartlegging, slik at det kan avklarast om det finst førekomstar som kan utvinnast på lønnsamt vis.