Aukar inntektene, men flest går i minus

ANALYSE

Mangelen på pengemaskiner var tema då resultata for dei børsnoterte selskapa per 3. kvartal 2022 vart oppsummert i fjor. Med eit par unntak er tal per 4. kvartal 2022 klare, og tendensen er den same.

Dei fleste børsnoterte selskapa på Nordvestlandet gjekk med underskot i fjor, og det samla underskotet var større i 2022 enn i 2021, som du kan lese i tabellane under.

Å berre sjå på resultat-tala gir imidlertid ikkje heile biletet.

Driftsinntektene er opp 23 prosent sidan 2021, til 15,4 milliardar kroner for alle selskapa til saman. Med to unntak var det inntektsvekst for alle selskapa i fjor.

Inntektsvekst er normalt ein god ting, i alle fall om den blir kombinert med ei betring i lønsemda.

Om ikkje selskapet går i pluss er det i alle fall bra at det relative underskotet - underskot i høve til driftsinntekter - krympar. 12 av selskapa i oversikta var meir lønsame/mindre ulønsame i 2022 enn i 2021, sjølv om samanlagtresultatet var dårlegare lønsemd.

(Artikkelen held fram under tabellen)

Særtrekk og spesielle hendingar/faktorar hos einskildselskap må også med i forklaringa på at tala svingar som dei gjer:

* Hav Group arbeider i stor grad med større prosjekt, med store svingingar i inntektene alt etter når prosjekta er ferdig.

* Etter oppkjøp og samanslåingar er dagens Eqva (tidlegare Havyard Group) er eit heilt anna selskap i 2022 enn i 2021. Dei to åra kan ikkje samanliknast.

* Oppskriving av flåteverdiar kombinert med innhald i avtalen med långivarane gjorde at den bokførte gjelda auka hos Havila Shipping i fjerde kvartal.

* Havila Kystruten har berre to av fire skip i drift, men har ein organisasjon og eit kostnadsnivå ut over det som må til for å drive berre to skip.

I tillegg til Havila Kystruten er det Hexagon Purus og Hexagon Composites som medverkar mest til det samla underskotet for børsnoterte selskap på Nordvestlandet. Hexagon Purus lagar tankar og system for bruk av hydrogen som energiberar. Sjølv om veksten er stor for selskapet, driv det i ein marknad som framleis er liten og ulønsam.

Hexagon Composites, som lagar tankar og system for bruk av natur- og biogass som energikjelde, er største aksjonær Hexagon Purus. Det eigarskapet er hovudårsaka til underskotet i Hexagon Composites.

(Artikkelen held fram under lenkene til resultatsakene for kvart selskap)

Medan rekneskapen fortel korleis det har gått fortel aksjekursutviklinga korleis investorane i aksjemarknaden ventar at det skal gå framover.

Ingen er så optimistiske som Nortel-aksjonærane (sjå tabell under), av den enkle grunn av selskapet nyleg fortalde at det har fleire moglege kjøparar av selskapet på handa. Det har gitt aksjekursen eit løft på neste 55 prosent sidan årsskiftet.

Sju andre selskap har også hatt ei postiv kursutvikling i år, medan åtte selskap har falle i verdi på børsen.