Nye tankar i familiebedriftene

Medan generasjonskifte i familiebedriftene tidlegare skjedde ved at dei aktive eigarane tok over, er trenden no at også dei som ikkje skal vere aktive eigarar får ei større rolle.

Det seier Ingvild Vartdal i advokatselskapet Adviso.

- Det er meir konkrete vurderinga og dialog med neste generasjon, seier ho om korleis familieigde bedrifter handterer komande generasjonskifte.

Saman med Pir og First House har Adviso samla fullt hus på eit seminar i Ålesund onsdag, om kven som skal eige bedriftene på Sunnmøre.

Fullt hus betyr omlag rundt 170 deltakarar, der fleirtalet av deltakarane sjølve er grunnleggarar, eller eigarar av bedrifter på Nordvestlandet.

Det er fleire modellar for avtalar mellom eigarane i familieselskap som kan regulere tilhøvet mellom aktive og passive eigarar, seier Vartdal. Det har vore med på å gi alternativ, der fleire familiemedlemar blir med som eigarar etter eit generasjonskifte om familien ønskjer det, meiner ho.

Det er ingen fasit for kven som skal eige bedriftene, men det er viktig å sette i gang prosessen, sa leier for bedriftsmarknad i Sparebank1 SMN på Nordvestlandet, Jan Rune Hurlen i ein scenesamtale med Ole-Reinhart Notø i Adviso.

Dei hadde ingen konklusjon om kva som er svaret på spørsmålet om kven som skal eige bedriftene på Sunnmøre. Sjølv om dei deler vurderinga av eit lokalt eigarskap, viste dei og til fleire eigarskifte der eigarar utanfrå har slått positivt ut.