Bad Listhaug om hjelp til havvind

Marin Teknikk er mellom selskapa som jobbar inn mot havvind, men administrerande direktør Svein-Rune Gjerde er kritisk til fleire sider ved regjeringa si industrisatsing.

Då Frp-leiar Sylvi Listhaug bad han om stortingspolitikaren påverke til at det blir opna større områder.

- Det var eit brukbart stort område som var planlagt, men så kom regjeringa og delte det opp og utsette delar av utlysinga, sa Gjerde.

Klynga har størst tru på havvind
Det Marin Teknikk-sjefen siktar til, er avgjerda om å vente med delar av området kalla Sørlige Nordsjø II. Heile området som ligg på grensa mot den danske kontinentalsokkelen, var tenkt lagt ut saman med Utsira Nord – men er utsett på ukjent tid.

Listhaug er ikkje kjent som den ivrigaste tilhengaren av havvind, men noterte seg innspelet frå bedriftsleiaren.

Behovet vil vere stort framover for serviceskip og konstruksjonsfartøy til denne marknaden, og ei undersøking i fjor viste at den maritime klynga har størst trua på havvind som vekstområde.

Har fleire interessante dialogar
Fleire Marin Teknikk-designa skip er i bruk i havvind, men førebels har dei ikkje teikna nybygg som blir bygd spesielt retta mot denne industrien. Gjerde fortalde at Herøy-selskapet kom seint på marknaden, fordi dei hadde mykje anna å gjere på tidspunktet dei første kontraktane kom.

No har dei fleire interessante dialogar.

– Vi har gode diskusjonar mellom anna med Aker BP og Equinor, som har store planar om å bygge ut offshore vindkraft, sa Gjerde.

Han fortel at det sterk konkurranse og tøft å kome inn på marknaden - og er overtydd om at det vil vere smart å opne for større områder.

Vil ha havvind-kabel til kontinentet
Marin Teknikk-sjefen kan heller ikkje forstå kvifor regjeringa vil føre straumen frå havvindproduksjonen i kabel til Norge.

- Om ein skal bygge ut, så bør alt byggjast ut – og så bør kabelen leggjast til Tyskland, eller kontinentet, der dei er vande med å betale to-tre kroner kilowattimen.

– Vi må vere litt meir forretningsfolk – også i politikken, la Gjerde til.

Her var Frp-leiaren heilt på linje, og påpeika at partiet hadde vore mot at kabelen skulle gå til Norge. Elektrifiseringa av sokkelen og batterifabrikkar, er også på lista over industrisatsingar, som Frp er i mot, la Listhaug til.

Ventar stor vekst og etterspurnad på skip
Ein rekke rapportar dei siste åra har vist eit stort potensial for bygging av nye skip til havvind.

Seinast førre veke kom Clarksons Research med ein rapport som viste at flåten var oppe i 1283 fartøy globalt, samtidig som kring 190 var under bygging.

I løpet av dei neste fem åra, ventar analysebyrået investeringar på heile 260 milliardar kroner i slike fartøy.

Fryktar Norge blir akterutsegla
Fleire selskap på Nordvestlandet er allereie på gong med leveransar og tenester til havvindparkar. Samtidig blir det peika på at norsk industri er i ferd med å sakke akterut.

Gjerde er ikkje i tvil om at det hastar: – For kvar dag som går, er vi meir akterutsegla, sa han.

Som eit døme viste Marin Teknikk-sjefen til at dei har utvikla eit design som er skreddarsydd for havvindmarknaden – men skil seg ein del frå skipa som er på marknaden.

Testar hos Sintef Ocean viser at båtane, vil vere meir driftseffektive, enn andre båtar. Likevel opplever selskapet at det er tungt å få innpass.

– Det viser seg å vere utfordrande å kome inn seinare, og seie at vi er betre, la han til.