Inntektene veks, lønsemda heng etter

Dei samla inntektene til dei børsnoterte selskapa på Nordvestlandet steig 18 prosent i fjor, til 17 milliardar kroner.

Størst inntektsvekst i kroner er det hos Hexagon Composites og Norva24.

Hexagon Composites med hovudkontor i Ålesund lagar tankar og system for bruk av natur- og biogass som energikjelde. Norva24 med hovudkontor i Stryn er eit selskap for vedlikehald av infrastruktur under bakken, blant anna rør og avløpssystem.

Oppdrettsselskapet Salmon Evolution har relativt størst inntektsauke. Det landbaserte oppdrettsselskapet er på veg mot full utnytting av produksjonskapasiteten i første byggetrinn av anlegget i Indre Harøy i Romsdal.

Nest størst relativ inntektsvekst har Havila Kystruten, som først i fjerde kvartal i fjor hadde alle sine fire skip i full drift.

Størst relativ inntektsreduksjon hadde industri- og ingeniørselskapet Endûr. Konsernet omfattar mellom anna dotterselskapet Artec Aqua i Ålesund, som teiknar og prosjekterer landbaserte oppdrettsanlegg.

Innføringa av grunnrenteskatt i oppdrettsnæringa sette mange slike investeringar på vent, og det fekk Artec Aqua svi for i 2023.

Meir om børsselskapa frå nordvest:

Mest minus
Akkurat som i 2022, går dei fleste børsnoterte selskapa i minus (sjå tabell under).

Hexagon Composites reduserte i fjor eigarskapen sin i Hexagon Purus til under 50 prosent. Den operasjonen utløyste både ei oppskriving, og deretter ei nedskriving av verdiane, som gjer at 2022- og 2023-resultatet før og etter skatt, ikkje kan direkte samanliknast.

Sjølv om Hexagon Composites ikkje blir rekna med, gjekk dei børsnoterte selskapa på Nordvestlandet likevel i minus samla sett i fjor.

Det er Hexagon Purus, Havila Kystruten og Salmon Evolution som hadde dei største underskota.

Ekornes-nedgang
Blant selskapa som ikkje er børsnoterte, men har børsnoterte obligasjonslån, fall inntektene frå 2022 til 2023.

Det skuldast delvis ein reell inntektssvikt, hos Ekornes. Under koronapandemien var det boom for møbelbransjen, mellom anna fordi folk brukte pengar dei ellers ville brukt på feriereiser til å kjøpe nye møblar.

Då pandemien tok slutt tok også møbelboomen slutt, og marknaden vart ytterlegare forverra av rente- og kostnadsauke.

For elektrisitetsprodusenten Sogn og Fjordane Energi sin del er årsaka til inntektsnedgangen at selskapet har skilt ut nettselskapet sitt, og slått det saman med nettselskapet til Tussa og Tafjord, til nettselskapet Linja.

Milliardar borte
Samanlikna med utløpet av 2023 er verdien av dei børsnoterte selskapa på Nordvestlandet redusert med 3,3 milliardar kroner, til 22,6 milliardar kroner (justert for selskap som ikkje lenger står på NETT NO si liste, og medrekna børsverdien av Atlantic Sapphire, som enno ikkje har levert 2023-rekneskapen).

Held året fram som det har starta når det gjeld aksjekursutvikling, blir 2024 det fjerde året på rad der verdiane krympar for eigarane av dei børsnoterte selskapa i regionen.

Størst kursfall hittil i år har Hexagon Purus og Hexagon Composites. No er dei to selskapa verdsett til til saman 5,3 milliardar kroner på børsen. Ved utgangen av 2023 var verdien 8,9 milliardar meir.

Les om alle børsselskapa sine resultat: