Skipstunnelen må vente på rettssaker

Denne veka blei det jubla for at regjeringa vil lyse ut anbodet for Stad skipstunnel. Stortingspolitikar Per Vidar Kjølmoen (Ap) håpte det ville vere mogleg å rekke ei utlysing allereie i år då han slapp nyheita til pressa i Herøy.

Av fleire årsaker vil den tidsplanen ryke, fortel prosjektleiar for Stad skipstunnel, Terje Skjeppestad, i Kystverket til NETT NO.

– Vi jobbar ut frå at vi får ei stadfesting frå Stortinget, regjeringa eller departementet om vegen vidare. Då tenker eg vi skal vere klare til å lyse ut anbodet ein gong første halvår neste år, seier han.

Om prisen frå entreprenørane blir høgare enn venta, kan prosjektet vere avhengig av ny stortingsbehandling.

Må vente på rettsprosessar
I tillegg til usikkerheit kring den politiske handsaminga, må ei utlysing vente på behandlinga av fleire rettssaker.

– Det er 15-20 hus, naust, garasjar og låvar som er - eller skal - kjøpast ut. Av desse er det to-tre saker som skal til retten. Dei prosessane må vere avslutta og der har ikkje vi styring på tida, seier Skjeppestad.

I hovudsak er det ueinigheit om grunnlaget for ekspropriasjon og pris som skal til behandling i retten.

Prisjustert til drygt fem milliardar
Prosjektleiaren påpeiker at per no, så har han ikkje fått meir informasjon enn det som har kome fram i media.

Han har oppfatta at skipstunnelprosjektet får ei indeksregulering – eller ei prisjustert ramme – som gjer at kostnadsramma - (omtala som P85, journ. anm.) er oppe i 5060 millionar kroner inkludert moms for 2024.

– Per no veit vi ikkje om saka skal opp i budsjettforhandlingane, og vi veit ikkje om det kjem inn andre premiss. Men vi ferdigstiller anbodsdokumenta slik at vi er klare til å lyse ut så snart vi får ei avklaring, seier han.

Samtidig må siste fase av arbeidet med grunnerverv starte opp att, etter at det vart sett på pause tidlegare i år.

Vil orientere Stortinget i statsbudsjettet
I eit svar på eit skriftleg spørmål frå Frank Sve (Frp) i Stortinget, svarar fiskeri- og havminister Bjørnar Skjæran at Kystverket har gjort ein gjennomgang av kostnadsreduksjonar, i tråd med omtalen i revidert budsjett.

– Regjeringa vil i budsjettet for 2024 orientere Stortinget om at vi vil igangsette ein anbodskonkurranse for bygging av Stad skipstunnel innanfor den kostnadsramma som Stortinget har vedtatt, justert for prisstigning, svarar Skjæran.

– Godt fjell fram til no
No om dagen er det kjerneboring det er knytt størst spenning til. Førde-firmaet Entreprenørservice har fått oppgåva med å bore seg 1050 meter inn i fjellet frå Kjøde-sida.

– Vi er komne rundt 400 meter inn, og vi har fått stadfesta det vi trudde. Frå Kjøde-sida er det mykje vatn dei første par hundre meterane, men så har det vore godt fjell fram til no, seier Skjeppestad,

Tidlegare er det bora kring 700 meter inn i fjellet frå Moldefjorden. Med arbeidet som no går føre seg, vil heile tunnelløpet på 1700 meter vere kartlagt.

Skal lage prioritert liste over massebruken
Det har vore stor interesse for å bruke steinmassane som blir tatt ut av fjellet. Kommunane kring Stadlandet har tidlegare vore utfordra til å levere ei liste over kva prosjekt dei ønsker skal prioriterast.

– Den oppgåva har no Kystverket fått i staden. Vi er i startgropa på det arbeidet. Det første vi skal gjere er å få ei totaloversikt over kven som ønsker massar, fortel Skjeppestad.

– Viss alle som ønsker stein skulle få det, så har vi ikkje nok, legg han til.

– Nytteverdien vil vere viktig
Ein fersk rapport om ringverknader frå bygging av skipstunnelen viste at berre i Stad kommune var det ni område under planlegging, mellom anna Stad Molo-prosjektet ved Leikanger.

På Raudeberg i Kinn har industriklynga behov for nytt areal og kaianlegg.

I Vanylven er det planar om å utvide, eller lage nye næringsareal på Fiskåholmen, Småstranda og Breivika, - i tillegg har Mowi areal som kan ta i mot tunnelmasse på Sighaug.

– Vi skal prøve å levere så mykje stein vi kan, samtidig har vi ei økonomisk utfordring i denne vurderinga. Våre kostnadar og nytteverdien vil vere viktig, seier Skjeppestad.

(saka held fram under)

Sjå video Kystverket har laga om Stad skipstunnel:

Påpeika høg usikkerheit ved prosjektet
Tidlegare i år hang bygginga av Stad skipstunnel igjen i ein tynn tråd, etter at nye anslag viste at prislappen kan bli opptil 60-70 prosent dyrare enn venta.

Ifølgje ei kostnads- og usikkerheitsanalyse frå Marstrand As, kan prisen kome opp i 7,1 milliarder. I analysen påpeiker forfattarane at det er høg usikkerhet ved prosjektet fordi det ikkje er bygd samanliknbare skipstunnelar tidlegere – og at denne ikkje bør undervurderast.

Den usikkerheita utgjorde store delar av dei nye kostnadsanslaga.

I rapporten blir det samtidig påpeka at det er ei reell mulighet for å realisere heile prosjektet til under 3,8 milliardar kroner.