Skal drive Momentium si nye storstove

I desse dagar er Kathrine Synnes Finnskog travelt oppteken med å førebu opninga av Løvenvold Theater til hausten. Etter kring 30 år i musikkbransjen i Oslo, er ho tilbake i heimtraktene i ny rolle som sjef for Momentium si nye storstove i Ålesund.

Her skal porten vere høg og vid for kva som skal skje. Planane inkluderer både kino, show, konsertar og foredrag.

- Akkurat no etterlyser vi gode historier og minner frå folk som har brukt Løvenvold opp gjennom historia, fortel ho til NETT NO.

Imponert over kulturbransjen i nordvest
I tillegg til å halde i roret ved Løvenvold, skal Finnskog jobbe med å utvikle nye musikk- og kulturprosjekt for sin nye arbeidsgivar. Ho bør ha gode føresetnader etter å ha leia musikkbransjens eksportorganisasjon, Music Norway, sidan oppstarten i 2012.

Finnskog er imponert over utviklinga i kulturbransjen på Nordvestlandet dei siste åra. Hennar nye arbeidsgivar, er ein av grunnane.

- Momentium har vore uredde og hatt visjonar til å bygge opp eit eige økosystem med kompetanse som gjer dei både til ein regional og nasjonal «hub», seier ho om sin nye arbeidsgivar.

Har skapt fleire verksemder
I dag står artistar i kø for å spele inn musikk ved Ocean Sound Recordings på Giske, medan næringslivet kjem til Øygardshallen på konferansar. Billettselskapet Tikkio er eit anna døme på verksemd som har sprunge ut av Momentium-miljøet.

- Eg nytta gjerne Momentium som eksempel i Music Norway-jobben. Dei har vore flinke til å drive kommersielt og økonomisk berekraftig. Samtidig har dei blitt ein aktør i byutviklinga, og hjelper næringslivet med å rekruttere nye folk til regionen, påpeiker Finnskog.

- Folk har meir orden i sysakene
Finnskog fortel at heile kulturbransjen har gått gjennom ei profesjonalisering, spesielt dei siste ti åra.

- Folk har meir orden i sysakene og blitt betre på heile «back-office»-delen, seier ho.

-Tidlegare slutta mange i slike kreative yrker når dei skulle etablere seg, fordi det ikkje var liv laga. No ser vi også lokalt at det blir fleire arbeidsplassar og at vi er blitt til ei større næring, legg ho til.

Meir lokal verdiskaping
Eit sterkare kulturmiljø betyr meir lokal verdiskaping. Tidlegare forsvann gjerne alle inntektene når artistar reiste ut i jakta på eit gjennombrot.

- Ein artist må ikkje lengre gå vegen om store nasjonale institusjonar for å kome seg ut i verda, påpeiker ho.

No kan ei artistkarriere like gjerne byggast frå Ålesund. Og ved å samarbeide med lokale aktørar får også desse meir kunnskap om kva som krevst for å lukkast.

- Den innsikta vil vi gjerne ha meir av. Slik erfaring er viktig for å utvikle nye karrierar og få artistar ut i verda. Jo lengre norske aktørar får vere med på den reisa, jo betre rusta er dei til å bruke erfaringa til å bygge nye talent seinare, seier ho.

Sigrid med norske aktørar i ryggen
Musikkeksporten frå Nordvestlandet har teke seg kraftig opp dei siste åra, med Sigrid Solbakk Raabe som den største suksessen.

Ålesundartisten er også mellom dei som har vore bevisst på å ha både management, crew og musikarar frå Norge, fortel Finnskog. Ein betydeleg del av inntektene til artisten kjem difor til selskapet hennar Sala Music, i staden for eit aktør i London eller Los Angeles.

- Det har blitt større forståing for at vi kan forvalte rettigheitene til artistane på norske hender. Ein treng ikkje signere vekk slikt til store internasjonale selskap, seier ho.

Auka sjølvtillit i bransjen
Finnskog påpeiker at ein norsk artist uansett gjerne blir liten i internasjonal samanheng. Då kan det vere bra å ha eit meir lokalt selskap i ryggen som vil prioritere nettopp di karriere.

- Då bygger ein samtidig karrieren til det norske selskapet, legg ho til.

Med fleire artistar som har internasjonal suksess, aukar også sjølvtilliten til bransjen her heime.

- No opplever vi ein god situasjon med fleire store artistar som har gjort det bra, der også norske aktørar har vore med, fortel ho.